लडाखला उभारणार सेंद्रिय शेती संशोधन केंद्र

पुणे ः विविध शैक्षणिक क्षेत्रातील संशोधनावर आघाडीवर असलेले सावित्रीबाई फुले पुणे विद्यापीठ आता कृषी संशोधन क्षेत्रात उतरणार आहे. लवकरच लडाख येथे कृषी क्षेत्रावरील विविध संशोधनाबरोबर जैविक शेती संशोधन केंद्र उभारले जाणार आहे. तेथील अभ्यासक्रमाची माहिती घेऊन हे संशोधन केंद्र सुरू करण्यासाठी कुलगुरू डॉ. नितीन करमळकर यांच्या अध्यक्षतेखाली विद्यापीठाची समिती लवकरच लडाख दौऱ्यावर जाणार आहे. 

केंद्र सरकारने जम्मू-काश्‍मीरमधील ‘कलम ३७०’ रद्द केल्यानंतर या भागात शैक्षणिक संस्था, संशोधन केंद्रे, उद्योग सुरू करण्यासाठी व या भागात गुंतवणूक करण्यासाठी केंद्र सरकार प्रोत्साहन देत आहे. यामुळे या भागात कृषी क्षेत्रासह, आर्थिक विकास, रोजगार व शैक्षणिक संधी उपलब्ध होणार आहे. 

देशातील अनेक शिक्षण संस्थांनीही जम्मू कश्‍मीरमध्ये जाण्याची तयारी दर्शवली आहे. त्याचप्रमाणे केंद्राने लडाखला केंद्र शासित प्रदेशाचा दर्जा दिल्याने त्या भागातही विकासाची पाऊले उचलली जात आहेत. पुणे विद्यापीठाने तेथे शैक्षणिक क्षेत्रात संशोधन करण्यासाठीचा ठराव विद्यापीठाच्या व्यवस्थापन परिषदेच्या बैठकीत मांडला होता. 

लडाखचे खासदार जामयांग नामग्याल यांनीही संशोधन केंद्र सुरू करण्यासाठी लडाखला भेट द्यावी, अशी विनंती पत्राद्वारे केली होती. त्यानुसार पुणे विद्यापीठाने संशोधन केंद्राच्या उभारणीसाठी कुलगुरू करमळकर यांच्या अध्यक्षतेखाली समिती गठित केली आहे. त्यामध्ये विद्यापीठातील तज्ज्ञ प्राध्यापकांचा समावेश आहे. १५ नोव्हेंबरपूर्वी ही समिती लडाखचा दौरा करणार असून, तेथे संशोधन केंद्र सुरू करण्यासाठीची प्रक्रिया मार्गी लावली जाणार असल्याचे विद्यापीठाच्या वतीने सांगण्यात आहे.  

कृषीसह भूशास्त्र विषयावर होणार संशोधन  लडाखमधील संस्थांच्या मदतीने पुणे विद्यापीठ हिमनदी, भूशास्त्र, कृषी, सेंद्रिय आणि औषधी वनस्पती शेती, नैसर्गिक साधनसंपत्ती या विषयावर संशोधन करणार आहे. त्यासाठी लागणाऱ्या सुविधा व मनुष्यबळ याची माहिती विद्यापीठाने मागविली आहे.