थंडीमुळे नुकसानग्रस्त पिकांची पाहणी

ईट, जि. उस्मानाबाद : थंडीचा पिकावर दुहेरी परिणाम झाला असून, वाढलेली थंडी गहू, हरभरा यांसारख्या पिकांसाठी पोषक आहे. या पिकांना थंडीचा फायदा होईल. परंतु बदलत्या वातावरणामुळे ज्वारी पिकांवर किडींचा प्रादुर्भाव वाढू लागला. कृषी विभागाकडून (ता. ३) गुरुवार रोजी दुपारी वाजता ज्वारी पिकांची पाहाणी करण्यात आली.

मंडळ कृषी अधिकारी निखिल रायकर, कृषी पर्यवेक्षक जीवन राऊत यांनी आंद्रुड (ता. भूम) मारुती लिमकर यांच्या शेतातील ज्वारीची पाहणी केली. या रोगाच्या नियंत्रणाकडे वेळीच लक्ष द्यावे. वाढलेल्या थंडीसाठी फळपिके तुलनेने अधिक संवेदनशील असतात. सध्या ज्वारी अनेक ठिकाणी हुरड्याच्या स्थितीत आहे. या वाढलेल्या थंडीमुळे पहाटे धुके आणि दव पडल्यास ज्वारीवर चिकट्या रोगाचा प्रादुर्भाव वाढू लागला आहे. 

सकाळी धुके पडणाऱ्या भागात ज्वारीच्या कणसावर काळी बुरशी वाढून त्याचा परिणाम दाण्यांच्या प्रतीवर होवून काळे दाणे पडल्यास अशा ज्वारीची प्रत खराब होऊन बाजारात भाव कमी मिळू शकतो.  उशिरा पेरलेल्या ज्वारीवर सध्या पाहणी केली असता पिकाची पाने करपली आहेत. शक्‍य असल्यास तुषार संचने पाणी दिल्यास ज्वारी पूर्ववत होण्यास मदत होइल. कडाक्‍याच्या थंडीमुळे तापमानात मोठी घट झाली. हे तापमान नियंत्रित करण्यासाठी शेतकऱ्यांनी आपआपल्या परीने प्रयत्न करणे गरजेचे आहे. 

शेकोटी पेटवणे, रात्री पाणी देणे इ. मुळे घटलेले तापमान काही प्रमाणात का होईना नक्कीच नियंत्रित करता येईल व होणारे नुकसान कमी करता येईल, असे कृषी विभागाच्या कर्मचाऱ्यांचे म्हणणे आहे. 

‘ज्वारी पिकाला रात्री किंवा पहाटेच्या वेळी तुषार सिंचनाने पाणी द्यावे. शेतात ओला काडीकचरा, गवत जाळून धूर करावा. बहुतांश सर्व पिकांमध्ये रात्रीच्या वेळी पाणी दिल्यास पिकांचे थंडीपासून संरक्षण होण्यास मदत होते’.  - निखिल रायकर, मंडळ कृषी अधिकारी