धुळे जिल्ह्यात मक्यावर लष्करी अळीचा प्रादुर्भाव

देऊर, जि. धुळे  : जिल्ह्यात मका पिकावर अमेरिकन लष्करी अळीचा प्रादुर्भाव मोठ्या प्रमाणावर दिसून येत आहे. सुरूवातीला कमी प्रमाणात असलेली लष्करी अळी सर्वच ठिकाणी दिसून येत आहे. त्यामुळे शेतकरी धास्तावले आहेत. अळी पाने फस्त करीत असून, पिकाची स्थिती बिकट बनत आहे.

यंदा अळीमुळे पुन्हा एकदा शेतकऱ्यांसमोरील अडचणी वाढत आहेत. अनेक शेतकरी मका लागवडीला प्राधान्य देतात. धुळे, शिंदखेडा, साक्री, शिरपूर तालुक्यातही मका पीक असते. मागील महिन्यात वेळेत पेरणी झाली. लागवड सुमारे १५ ते १६ हजार हेक्टरवर झाली आहे.  अळीच्या प्रादुर्भावामुळे पीकसंरक्षणाचा खर्च वाढत आहे. एकरी एका फवारणीसाठी दोन ते अडीच हजार रुपये खर्च मजुरीसह येत आहे. सुरवातीला अळीचा शिरकाव दिसत नव्हता. परंतु, महिनाभरानंतर हा प्रादुर्भाव वाढू लागला आहे. धुळे तालुक्यातील देऊरसह इतर भागात अळीमुळे पिकांचे ५० ते ७० टक्क्यांवर नुकसानही झाले.

रब्बीमध्ये मक्याला अपेक्षित दर मिळाला नाही. आता पिकावर लष्करी अळीचा प्रादुर्भाव दिसून आल्याने पानांना छिद्रे  पडून ती पांढरी, पिवळी होत आहेत. शेतकऱ्यांनी एकदा किडनाशकांची फवारणी केली. पुन्हा फवारणीची तयारी करावी लागत आहे.

प्रादुर्भाव आटोक्यात आणण्यासाठी संबंधित यंत्रणांकडून सुरवातीपासून कार्यवाही झाली नाही. कामगंध सापळ्यांचे मोफत वितरण करण्याची मागणी होत आहे. मका पिकाच्या पोंग्यात टाकण्यासाठी आवश्‍यक किडनाशकांचे वितरणही व्हायला हवे, असे शेतकऱ्यांचे म्हणणे आहे.