परभणीत ऊस, चारा पिकांवर नाकतोड्याचा प्रादुर्भाव

परभणी : वांगी (ता.परभणी) येथील ऊस पीक झालेल्या नाकतोड्याचा प्राद्रुर्भावाची पाहणी वसंतराव नाईक मराठवाडा कृषी विद्यापीठ आणि कृषी विभागाच्या पथकाने गुरुवारी (ता.६) केली. यावेळी या किडीच्या व्यवस्थापनाचा सल्ला शेतकऱ्यांना दिला. 

गेल्या काही दिवसांपासून मराठवाडा विभागात काही प्रमाणात नाकतोडे (ग्रॉसहॉपर) या किडीचा प्रादूर्भाव झाला आहे. काही ठिकाणी ऊस, मका, ज्वारी, कापूस आदी पिकांवर त्याचा प्रादुर्भाव झाल्याचे कृषी विभागाच्या क्षेत्रीय यंत्रणेमार्फत आढळून आले. त्या अनुषंगाने जिल्हा अधीक्षक कृषि अधिकारी संतोष आळसे, विद्यापीठातील कीटकशास्त्र विभागाचे विभाग प्रमुख डॉ. संजीव बंटेवाड, डॉ. बस्वराज भेदे, क्रॉपसॅप प्रकल्पाचे समन्वय अधिकारी डॉ. अनंत बडगुजर, तालुका कृषी अधिकारी प्रभाकर बनसावडे, मंडळ कृषी अधिकारी के. एम. जाधव यांच्या पथकाने गुरुवारी (ता.६) वांगी येथील ऊस आणि चारा पिकांची पाहणी केली.

त्यावेळी ठराविक शेतावर नाकतोड्यांचा प्रादुर्भाव मोठ्या प्रमाणावर दिसून आला. प्रादुर्भाव असाच वाढत राहिला तर ऊस मका, चारा पिकांवर या किडींचा उद्रेक होउ शकतो. त्यामुळे खबरदारीचा उपाय म्हणून या किडींचे व्यवस्थापन शेतकऱ्यांनी वेळीच करणे आवश्यक आहे.  असे करा व्यवस्थापन

नाकतोड्याने अंडी घातलेल्या जागा शोधून जमिनीच्या भोवताली चर खोदल्यास पिलांना अटकाव करुन नियंत्रण करता येते. अंडी शोधून सामुहिकरित्या नष्ट करावीत. सुरुवातीच्या स्थितीत पिल्लांची संख्या जास्त असल्याने निमतेल अडीच लिटर प्रति हेक्टरी या प्रमाणे फवारणी करावी. या किडींसाठी केंद्रिय कीटकनाशक मंडळाकडून कुठल्याही कीटकनाशकाची शिफारस नाही. परंतु, केंद्रिय किटकनाशक मंडळ तसेच नोंदणी समितीने टोळकिडींसाठी शिफारस केलेली कीटकनाशके नाकतोड्यांसाठी सुध्दा प्रभावी ठरु शकतात. परंतु, शास्त्रज्ञांच्या सल्ल्यानुसार त्यांचा वापर करावा. चारापिकांवर रासायनिक कीटकनाशकांची फवारणी टाळावी. 

नाकतोड्याचा मराठवाड्यातील संभाव्य धोका लक्षात घेता शेतकऱ्यांनी या किडीबाबत जागरुक रहावे. प्रादुर्भाव दिसून येताच सजगपणे किडींचे व्यवस्थापन करावे, असे आवाहन किटकशास्त्र विभागातर्फे आले आहे.