जालना : कृषी विभागातर्फे जिल्ह्यात एकाच दिवशी रविवारी (ता.२४) १५ हजार शेतकऱ्यांकडे उपलब्ध घरातील सोयाबीन बियाणे उगवण क्षमता तपासणीची मोहीम हाती घेण्यात आली आहे. त्या अंतर्गत जवळपास १२ हजार ३३४ शेतकऱ्यांनी सोयाबीन बियाण्याची उगवण क्षमता तपासण्याचे काम केले. येत्या चार दिवसांत त्याचा नेमका अहवाल प्राप्त होईल.
येत्या खरीप हंगामात सोयाबीन बियाण्याचा तुटवडा भासू नये, यासाठी शेतकऱ्यांना त्यांच्याकडे उपलब्ध असलेल्या सोयाबीन बियाण्याची उगवण क्षमता तपासून त्याचाच पेरणीसाठी वापर करा, असे आवाहन कृषी विभागातर्फे करण्यात आले. त्या आवाहनाला प्रतिसाद मिळण्याच्या उद्देशाने जालना जिल्हा कृषी विभागातर्फे जिल्ह्यातील कृषी व आत्मा विभागाची यंत्रणा तसेच शेतकरी गट, शेतकरी उत्पादक कंपन्या व कृषी मित्र, कृषी ताई यांच्या मदतीने ही मोहीम हाती घेण्यात आली.
त्या अंतर्गत २४ मे रोजी एकाच दिवशी १२३३४ शेतकऱ्यांनी आपल्याकडे उपलब्ध सोयाबीचा बियाणे म्हणून उपयोग होण्यासाठी कृषी विभागाने पुरविलेल्या बियाणे उगवण क्षमता तपासणी पेपर मध्ये टाकले. किती बियाणे उगवण क्षमतेत पास व किती नापास, हे अहवालातून स्पष्ट होईल, असे जिल्हा अधीक्षक कृषी अधिकारी बाळासाहेब शिंदे म्हणाले.
जवळपास तीस हजार बियाणे उगवण क्षमता तपासणी पेपरचे जिल्ह्यात विनामूल्य वाटप करण्यात आले आहे. प्रति गाव दहा ते १५ शेतकऱ्यांसाठी सोयाबीन उगवणक्षमता तपासणी करण्यासाठी प्रति शेतकरी दोन याप्रमाणे हे पेपर देण्यात आले. सोयाबीन व इतर बियाणे व क्षमता तपासणी प्रात्यक्षिक अंमलबजावणी करण्यासाठी गावातील कृषी मित्र, कृषी ताई , शेतकरी गट, शेतकरी उत्पादक कंपनी, गावातील प्रगतिशील शेतकरी, गावातील कृषी विभागाचे पुरस्कार प्राप्त शेतकऱ्यांची मदत घेण्याच्या सूचनाही करण्यात आल्या, असे शिंदे म्हणाले.
बियाणे उगवण क्षमता चाचणी नेमकी कशी करावी, याबाबत व्हिडिओ क्लिपद्वारे प्रात्यक्षिकाचे आयोजन करण्याचे, तसेच बीज प्रक्रिया नेमकी कशी करावी, याचीही माहिती देण्याचे सूचित करण्यात आले होते.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.