वऱ्हाडातील ६५ हजारांवर नागरिक गावी परतले

अकोला ः रोजगार, नोकरीच्या निमित्ताने शहरांमध्ये गेलेले वऱ्हाडातील सुमारे ६५ हजारांवर नागरिक आपल्या गावी परतले आहेत. बुलड़ाणा व वाशीम जिल्ह्यात प्रत्येकी २७ हजार तर अकोला जिल्ह्यात १३ हजारांवर नागरिक परतले आहेत.

कोरोनाच्या पार्श्वभूमीवर लॉकडाऊनची घोषणा होताच शहरांमध्ये वास्तव्यास असलेले ग्रामीण भागातील नागरिक गावी परतले. मुंबई, पुणे, औरंगाबाद, नाशिक अशा विविध शहरांमध्ये हे तरुण, नागरिक व्यवसाय, नोकरीच्या निमित्ताने गेलेले होते. शहरीभागात कोरोनाचा प्रादुर्भाव वेगाने पसरत असल्याने धास्तीपोटी हे सर्वजण परतले आहेत.   संचारबंदी लागू केल्यानंतरही विविध वाहनांद्वारे त्यांनी घराची रस्ता धरला होता. बाहेर जिल्ह्यांमधून, महानगरांमधून आलेल्यांची आरोग्य तपासणीचे काम वेगाने केले जात आहे. बुलडाणा जिल्ह्यात दाखल झालेल्यांपैकी प्रामुख्याने विदेशातून आलेल्यांपैकी ८५ जणांना हॉस्पिटल क्वारंटाइन आणि आयसोलेशन कक्षासह होम क्वारंटाइन राहण्याचा सल्ला देण्यात आला. 

जिल्हा परिषदेचा जिल्हा नियंत्रण कक्ष, तालुका नियंत्रण कक्षाने ही आकडेवारी गोळा केली. २७ हजारांपैकी २० हजार लोकांची आरोग्य तपासणी पूर्ण झाली आहे. जिल्ह्यात परतलेल्यांमध्ये सर्वाधिक साडेतीन हजार नागरिक एकट्या मोताळा तालुक्यातील आहेत. 

वाशीम जिल्ह्यातील २७ हजार २०९ नागरिक गावी परतले आहेत. त्यापैकी २३ हजार २०९ जण ग्रामीण भागातील आपापल्या गावांमध्ये पोचले आहेत. तर चार हजार हे शहरातील आहेत. या जिल्ह्यात वाशीम तालुक्यातील ५५६२ आणि मानोरा तालुक्यातील ५२३२ असे सर्वाधिक नागरिक रोजगारासाठी मुंबई, पुणे यासह आंध्रप्रदेश, गुजरात, मध्यप्रदेशात कामांसाठी गेलेले आहेत. कोरोनाच्या धास्तीमुळे ते गावी परतले आहेत. 

अकोला जिल्ह्यातील १२ हजारांवर नागरिक परतले असून त्यांचीही आरोग्य तपासणी करण्यात आली आहे.  पहिल्यांदाच इतक्या मोठ्या प्रमाणात घरवापसी झाली आहे. सुरुवातीला ग्रामीण भागात नागरिकांनी महानगरातून येणाऱ्यांना विरोधही केला होता. मात्र, हा मुद्दा आता सुटला आहे.