अमरावतीत दीड लाखांवर शेतकऱ्यांना मिळणार व्याज सवलतीचा फायदा

अमरावती : तीन लाखांपर्यंतचे कर्ज आणि नियमित कर्जदार शेतकऱ्यांना व्याज सवलत देण्याची घोषणा अर्थमंत्री अजित पवार यांनी केली. या घोषणेचा जिल्ह्यातील १.४७ लाख नियमित कर्जदारांना फायदा होणार आहे. त्याकरिता ३० जूनपर्यंत त्यांना कर्जाची परतफेड करावी लागेल. 

विधीमंडळाच्या अर्थसंकल्पीय अधिवेशनाचे नुकतेच सूप वाजले. यात नियमित कर्जदारांना व्याज सवलत देण्याची घोषणा करण्यात आली आहे. तीन लाखांपर्यंतचे कर्ज डॉ. पंजाबराव देशमुख व्याज सवलत योजनेसाठी पात्र ठरणार आहे. ३ डिसेंबर २०१२चे शासन आदेशानुसार डॉ. पंजाबराव देशमुख व्याज सवलत योजनेच्या निकषात बदल करण्यात आले आहेत. त्यानुसार एक लाखांपर्यंतचे कर्ज मुदतीत परतफेड केल्यास ३ टक्‍के व्याज सवलत मिळते. १ ते ३ लाखांपर्यंतचे कर्ज मुदतीत म्हणजे ३० जूनपर्यंत भरणा केल्यास एक टक्‍क्‍यांपर्यंत व्याजात सवलत मिळते.

विशेष म्हणजे या योजनेत सर्वच बॅंका कव्हर करण्यात आल्या आहेत. शेतकऱ्यांच्या पीककर्जासाठी नाबार्डकडून जिल्हा बॅंकेला व तेथून गावागावांतील विकास सोसायटी मार्फत खातेदारांना कर्जपुरवठा करण्यात येतो. यात एक लाखांपर्यंतचे कर्ज शून्य दराने शेतकऱ्यांना मिळते. मात्र जिल्हा बॅंकेला हे सहा टक्‍क्‍यांपर्यंत पडते. यात प्रत्येकी केंद्र व राज्य शासन तीन टक्‍के व्याज देते.

एक ते तीन लाखांच्या व्याजासाठी देखील राज्य शासन तीन व केंद्र शासन दोन टक्‍के रक्‍कम देते. आता ही सवलत तीन लाखांपर्यंतच्या नियमित कर्जधारकास मिळणार आहे. मात्र, यातील निकष शासन आदेश निघाल्यानंतरच स्पष्ट होणार आहेत. आता अधिवेशन संपल्याने शासन परिपत्रक लवकरच निघेल, अशी शक्‍यता वर्तविली जात आहे. जिल्ह्यात सुमारे १.४७ लाख नियमित कर्जदारांना यांचा फायदा होण्याची शक्‍यता वर्तविली जात आहे.

व्याज सवलत योजनेवर दृष्टीक्षेप