`क्यार` चक्रीवादळाचा सिंधुदुर्गातील ६८ हजार शेतकऱ्यांना फटका

सिंधुदुर्ग  ः ‘क्यार’ चक्रीवादळाने जिल्ह्यातील भातशेतीचे मोठे नुकसान झाले. या नुकसानीचे पंचनामे पूर्ण झाले असून, या चक्रीवादळामुळे ६८ हजार १४७ शेतकऱ्यांचे ३० हजार १५ हेक्टर क्षेत्र बाधित झाल्याचे स्पष्ट झाले आहे. मात्र अंतिम नुकसानीचा आकडा कमी झाला असून, १२४ कोटी ७८ लाख ६८ हजार रुपयांचे नुकसान झाले असल्याचे कृषी विभागाकडून सांगण्यात आले आहे.

जिल्ह्यात ‘क्यार’ चक्रीवादळामुळे झालेली अतिवृष्टी आणि लांबलेला पाऊस यामुळे जिल्ह्यातील परिपक्व स्थितीतील भातशेतीचे अतोनात नुकसान झाले. कृषी विभागाने सुरुवातीला जिल्ह्यातील २९ हजार ६८७ हेक्टर भातशेतीचे १३८ कोटींचे नुकसानीचा अदांज व्यक्त केला होता. कृषी सहायक, तलाठी, ग्रामसेवक गेले दहा ते बारा दिवस संयुक्तपणे नुकसानीचे पंचनामे करीत होते. पंचनामे करण्याचे काम पूर्ण झाले आहे. अंतिम आकडेवारीनुसार भातशेतीच्या नुकसान क्षेत्रात आणि शेतकऱ्यांच्या संख्येत वाढ झाली आहे. नुकसानीच्या क्षेत्रात ३२८ हेक्टरने वाढ झाली आहे, तर नुकसानग्रस्त शेतकऱ्यांच्या संख्येत ६०४९ हेक्टरने वाढ झाली आहे.

यापूर्वी कृषी विभागाने जिल्ह्यात भातशेतीचे २० कोटींचे नुकसान अपेक्षित धरले होते. मात्र पंचनामे करताना नुकसान अपेक्षेपेक्षा कित्येक पटीने असल्याचे निदर्शनास आले. त्या वेळी कृषी विभागाने भातशेतीचे नुकसान १३८ कोटींपर्यंत जाईल असा अंदाज व्यक्त केला होता. मात्र अंतिम नुकसानीचा आकडा हा १२४ कोटी ७८ लाख ६८ हजार रुपयांपर्यंत आला आहे. सर्वाधिक भातशेतीचे नुकसान कुडाळ तालुक्यात झाले आहे. नुकसानीचा अंतिम अहवाल जिल्हा कृषी विभागाने राज्य शासनाकडे पाठविला आहे.

असे आहे नुकसान  कुडाळ - ५५ कोटी ३ लाख, सावंतवाडी-२४ कोटी ७५ हजार, मालवण-२० कोटी ३ लाख ७६ हजार, कणकवली-१२ कोटी ९ लाख, वैभववाडी-७ कोटी ६ लाख, वेंगुर्ले-३कोटी २२ लाख ६१ हजार, देवगड-२ कोटी ४४ लाख १६ हजार, दोडामार्ग- ५ कोटी ४८ लाख १६ हजार रुपये.