भंडारा जिल्हाधिकाऱ्यांच्या उपस्थितीत धान कापणी

भंडारा : निलज (ता. मोहाडी) येथील पारबता गाढवे यांच्या शेतात जिल्हाधिकारी शांतनू गोयल यांच्या उपस्थितीत पीक कापणी प्रयोग करण्यात आला. या प्रयोगात हेक्‍टरी सरासरी ३६ क्‍विंटल धान उत्पादन झाले असून, त्याद्वारे २३ क्‍विंटल तांदळाचे उत्पादन होईल, असा अंदाज आहे.

कृषी विभागाचे उपसंचालक अरुण बलसाने, तंत्र अधिकारी मनीषा कवटे, तालुका कृषी अधिकारी रामटेके या वेळी उपस्थित होते. करडी महसूल मंडळातील निलज येथील पारबता गाढवे यांच्याकडील अर्धा एकराच्या दहा बाय दहाच्या प्लॉटवरील धान कापणी प्रयोग करण्यात आला. तनसासह धानाचे वजन पहिल्यांदा करण्यात आले. त्यानंतर धानाची कांडणी करण्यात आली. यातून मिळालेल्या धानाची मोजणी केली असता सरासरी हेक्‍टरी ३६ क्‍विंटल धान उत्पादन होईल, असा अंदाज या कापणी प्रयोगातून वर्तविण्यात आला.

कृषी विभागातर्फे प्रत्येक महसूल मंडळात १२ पीक कापणी प्रयोग करण्यात येतात. भंडारा जिल्ह्यात ३४ महसूल मंडळांत हा प्रयोग केला जात आहे. या प्रयोगातून जिल्ह्याच्या धान उत्पादनाची सरासरी काढण्यात येते. या वेळी जिल्हाधिकाऱ्यांनी शेतकऱ्यांशी संवाद साधत त्यांच्या अडचणी जाणून घेतल्या.