पंचगंगा, भोगावती धोक्याच्या पातळीवर

कोल्हापूर : जिल्ह्यात पावसाचा जोर कमी-अधिक प्रमाणात असला, तरी राधानगरी धरणातून पाणी सोडण्यात आल्याने भोगावती, पंचगंगा नद्या धोक्‍याच्या पातळीवरून वाहत आहेत. त्यामुळे प्रशासनाने खबरदारीचा इशारा दिला आहे. संततधार नसला तरी थांबून थांबून जोरदार सरी सुरू आहेत. यामुळे पाण्याच्या पातळीत वाढच होत आहे. अतिवृष्टीमुळे जिल्ह्यातील सात एसटी मार्ग बंद आहेत.

 संभाजीनगर-बाचणी, गडहिंग्लज -नांगनूर, गारगोटी किल्ला -मूरगुड मार्ग, चंदगड- दोडामार्ग तिलारी, कुरूंदवाड- बस्तवाड, गगनबावडा-कोल्हापूर आणि आजरा-चंदगड हे सात मार्ग पूर्णत: बंद करण्यात आल्याची माहिती राज्य परिवहन विभाग नियंत्रक रोहन पलंगे यांनी दिली. कोल्हापूर -गगनबावडा मार्गावर शिवाजी पूल ते केर्ली येथे पाणी आल्याने राधानगरीमार्गे पर्यायी मार्ग चालू आहे. इचलकरंजी- कागल- रेंदाळ मार्गावर रस्त्यावर पाणी आल्याने हा पर्यायी बोरगाव मार्गे सुरू आहे.

कागल- बस्तवडे -बाणगे मार्गावर पाणी असल्याने पर्यायी मुरगूड -अनूरमार्गे एसटी वाहतूक सुरू आहे. राधानगरी धरणाचे गुरुवारी रात्री दहा वाजता स्वयंचलित दरवाजा क्रमांक ३ आणि रात्री ११.१५ वाजता दरवाजा क्रमांक ६ बंद झाला.  केवळ ४ आणि ५ क्रमांकाचे २ दरवाजे सुरू आहेत. यामधून ४२५६ क्‍युसेक पाण्याचा विसर्ग सुरू आहे, अशी माहिती पूर नियंत्रण कक्षाचे समन्वय अधिकारी एस. एम. शिंदे यांनी दिली.

पंचगंगा नदीची राजाराम बंधाऱ्याजवळील पाणीपातळी शुक्रवारी (ता. २) सकाळी १० वाजता ४२ फूट ८ इंच आहे. एकूण ७९ बंधारे पाण्याखाली गेले आहेत. राधानगरी धरणात ८.२९  टीएमसी पाणीसाठा आहे. कोदे लघुप्रकल्प व जांबरे मध्यम प्रकल्प पूर्ण क्षमतेने भरला आहे. जिल्ह्यात अद्यापही ऐंशीहून अधिक बंधारे पाण्याखाली गेले आहेत. चांदोली धरणांतून पाणी सोडल्याने वारणा व कृष्णा नद्यांचे पाणी वेगात वाढत आहे, कृषी विभागाच्या सूत्रांनी सांगितले.