पंढरपूर भागात ऐन बहरातील शेवग्याला कोयता

करकंब, जि. सोलापूर ः ‘कोरोना’मुळे सर्वच शेतीमालाचा उठाव कमी झाला आहे. एकीकडे व्यापाऱ्यांनी शेती उत्पादनांकडे पाठ फिरवली आहे, तर दुसरीकडे वाहनचालकही धोका पत्करायला तयार नाहीत, याचा फटका करकंब परिसरात मोठ्या प्रमाणात असणाऱ्या शेवगा पिकांस ही बसला आहे. त्यामुळे शेतकऱ्यांनी चक्क ऐन बहरात असणाऱ्या शेवगा पिकावर कोयता चालविला आहे. 

पावसाळ्याच्या शेवटी सलग दीड महिना कमी अधिक प्रमाणात पडत राहिलेल्या पावसाचा मोठा फटका शेवगा पिकास बसला होता. रानात ओल टिकून राहिल्याने फुलेच निघाली नाहीत. जी निघाली त्यांची गळती झाली. त्यामुळे दोन महिने लांबलेला हंगाम सध्या बहरात आहे. पण ‘कोरोना’चे जागतिक संकट आल्याने वाहतूक व कृषी उत्पन्न बाजार समित्या बंद आहेत. त्यामुळे शेवग्याची विक्री होऊ शकत नाही. या भागातील शेवगा पंढरपूर, सोलापूर, पुणे, वाशी आदी ठिकाणी विक्रीसाठी जातो. येथील जास्त उत्पादन लक्षात घेऊन काही ठोक व्यापारीही जागेवरून माल विकत घेतात. 

पण सध्या ‘कोरोना’च्या धास्तीने शेतकऱ्यांपुढील उपरोक्त सर्व मार्ग बंद झाले आहेत. परिणामी झाडावरच शेंगा निब्बर होऊन नुकसान होऊ लागले आहे. डोळ्यादेखत होणारी हानी बघवत नसल्याने आता शेतकऱ्यांनी पुढील हंगामासाठी हातचा हंगाम सोडून छाटण्या चालू केल्या आहेत. तर काहीजण कुठे धावपळ करायची, कुणाच्या पाठीमागे लागायचं, असं म्हणत थेट शेवग्याला कोयता लावून ते काढूनच टाकत आहेत.