पंढरपूरला जिल्हा करावा
सोलापूर ः गेल्या अनेक दिवसांपासून मागणी होत असलेल्या पंढरपूरला स्वतंत्र जिल्हा करण्याच्या मागणीवर सोलापूर जिल्हा परिषदेच्या ऑनलाइन सर्वसाधारण सभेत गुरुवारी (ता. २९) चर्चा झाली. या सभेत पंढरपूर हा स्वतंत्र जिल्हा निर्माण करावा, असा ठराव करण्यात आला. त्यास सर्वच सदस्यांनी एकमताने पाठिंबा दिला.
जिल्हा परिषद अध्यक्ष अनिरुद्ध कांबळे यांच्या अध्यक्षतेखाली गुरुवारी सभा घेण्यात आली. मुख्य कार्यकारी अधिकारी दिलीप स्वामी यांच्यासह अन्य अधिकारी, पदाधिकारी या वेळी उपस्थित होते. सुरुवातीला कोळा (ता. सांगोला) येथील सदस्य अॅड. सचिन देशमुख यांनी पंढरपूर स्वतंत्र जिल्हा करण्याची मागणी केली.
माळशिरस, पंढरपूरला स्वतंत्र प्रांत कार्यालय आहे. सेशन कोर्टही आहे. फक्त जिल्हा परिषद व जिल्हाधिकारी कार्यालयांसाठी येथील लोकांना सोलापूरला जावे लागते. सुमारे दीडशे किलोमीटर अंतरावर ये-जा करणे सर्वसामान्यांना परवडत नाही. महसुली उत्पन्न सर्वाधिक या भागातून संकलित होते. पण विकासनिधी मिळताना दुय्यम स्थान मिळते. पंढरपूरला जिल्ह्याचा दर्जा मिळाल्यास विकास निधी मिळेल. त्यामुळे स्वतंत्र पंढरपूर जिल्ह्याची निर्मिती करावी, असा ठराव अॅड. देशमुख यांनी मांडला. त्यास सर्व सदस्यांनी पाठिंबा दिला.
त्या संदर्भातील प्रस्ताव शासनाकडे सादर करण्याची मागणी सदस्यांनी केली. कोरवली (ता. मोहोळ) येथील आरोग्य उपकेंद्राच्या बांधकामाच्या विषयावरून या सभेत जोरदार चर्चा झाली. संबंधित ठेकेदाराला काळ्या यादीत टाकण्याची मागणी सदस्या शैला गोडसे यांनी केली. कृषी सभापती अनिल मोटे, वसंतराव देशमुख, रजनी देशमुख, आनंद तानवडे या अन्य सदस्यांनीही या चर्चेत सहभाग घेतला. याशिवाय आर. आर. आबा पाटील स्मार्ट ग्राम पुरस्काराच्या रखडलेल्या कामाविषयीही अनेक सदस्यांनी नाराजी व्यक्त केली.
सभेत यावर झाली चर्चा
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.