परभणी जिल्ह्यात फळबाग योजनेतून १३७ हेक्टर फळपीक लागवड

परभणी ः भाऊसाहेब फुंडकर फळबाग लागवड योजनेअंतर्गंत २०१८-१९ मध्ये परभणी जिल्ह्यातील ६७५ शेतकऱ्यांना पूर्वसंमती देण्यात आली होती. परंतु दुष्काळी स्थितीमुळे फळबागा लागवडीसाठी तसेच त्या जिवंत ठेवण्यासाठी पाणी नसल्यामुळे प्रशासकीय मंजुरी देण्यात आलेल्या ३९९ पैकी २४४ शेतकरी फळबाग लागवड करू शकले नाहीत. सिंचनासाठी पाणी उपलब्ध असलेल्या १५५ शेतकऱ्यांनी १३७.३४ हेक्टरवर विविध फळपिकांची लागवड केली आहे.

गतवर्षी (२०१८-१९) फळपिकांची लागवड करू न शकलेल्या शेतकऱ्यांनी शुक्रवार (ता. ५) पर्यंत हाॅर्टनेट प्रणालीद्वारे आॅनलाइन अर्ज करणे आवश्यक आहे, असे कृषी विभागाच्या सूत्रांनी सांगितले.

भाऊसाहेब फुंडकर फळबाग लागवड योजनेअंतर्गंत जिल्ह्यासाठी २ कोटी ६० लाख रुपयांची आर्थिक तरतूद करण्यात आली होती. या योजने अंतर्गंत जिल्ह्यातील १३ हजार ५७२ शेतकऱ्यांनी १३ हजार ७७९.२० हेक्टरवर फळबाग लागवडीसाठी अर्ज केले होते. ६७५ शेतकऱ्यांना पूर्वसंमती देण्यात आली होती. त्यापैकी ३९९ शेतकऱ्यांना प्रशासकीय मंजुरी देण्यात आली. गतवर्षी फळबाग योजनेची सुरवात उशिरा झाली.त्यामुळे फळबाग लागवडीसाठी मार्च अखेर पर्यंतची मुदतवाढ देण्यात आली होती.