परभणी जिल्ह्यात दोन कोटी ४२ लाखांचा फळपीक विमा मंजूर

परभणी : पुनर्रचित हवामानाधारित फळपीक विमा योजना २०१८-१९ (आंबे बहर)अंतर्गत जिल्ह्यातील ४९९ शेतकऱ्यांना संत्रा, केळी, आंबा या फळपिकांच्या नुकसानीबद्दल २ कोटी ४२ लाख ४९ हजार ५६१ रुपये परतावा मंजूर करण्यात आला आहे. त्यापैकी ४५३ शेतकऱ्यांना २ कोटी १७ लाख रुपये ३९ हजार ५८५ रुपयांचा विमा परतावा अदा करण्यात येत आहे, अशी माहिती कृषी विभागाच्या सूत्रांनी दिली.

पुनर्रचित हवामान आधारित फळपीक विमा योजनेअंतर्गत २०१८-१९ मध्ये आंबे बहरसाठी जिल्ह्यातील केळी पिकांसाठी गंगाखेड, केकरजवळा, मानवत, पेडगाव, सिंगणापूर, पाथरी, आवलगाव या मंडळांचा, संत्रा फळपीकांसाठी जांब, मानवत, कात्नेश्वर, पूर्णा, मोसंबी फळपीकासाठी केकरजवळा, मानवत, पाथरी, चुडावा, सेलू, आंबा पिकासाठी केकरजवळा, मानवत, पिंगळी, लिमला या मंडळांचा समावेश होता. तर लिंबू या फळपिकासाठी दैठणा मंडळाचा समावेश होता.

अधिसूचित मंडळांतील ५६० शेतकऱ्यांनी ४६३.०३ हेक्टरवरील केळी, आंबा, संत्रा, मोसंबी, लिंबू या फळपिकांसाठी ३ कोटी ७५ लाख ८५ हजार २५० रुपये रकमेचे विमा संरक्षण घेतले. त्यासाठी शेतकऱ्यांनी १८ लाख ७९ हजार २७५ रुपये विमा हप्ता भरला. शेतकरी तसेच केंद्र आणि राज्य शासन यांच्या हिश्शांचा मिळून एकूण १ कोटी ४४ लाख ७७ हजार १९९ रुपये एवढा विमा हप्ता विमा कंपनीकडे भरण्यात आला.

विमा कंपनीने केळी पिकांच्या नुकसानीबद्दल ४६ शेतकऱ्यांना, आंबा पिकांच्या नुकसानीबद्दल ८ शेतकऱ्यांना, संत्रा पिकांच्या नुकसानीबद्दल ४४५ शेतकऱ्यांना २ कोटी ४२ लाख ४९ हजार ५६१ रुपये एवढा विमा परतावा मंजूर करण्यात आला.  ४५३ शेतकऱ्यांना २ कोटी १७ लाख ३९ हजार ५८५ रुपये एवढी परताव्याची रक्कम अदा केली असल्याचे कृषी विभागाच्या सूत्रांनी सांगितले.