परभणीत पीक कर्जवाटप प्रश्नी शेतकरी समितीचे आंदोलन

परभणी ः जिल्ह्यातील शेतकऱ्यांच्या पीक कर्जवाटप प्रश्नांवर तसेच नवीन खातेदारांना कर्जवाटप करावे, आदी मागण्यांसाठी शेतकरी संघर्ष समितीतर्फे सोमवारी (ता. २४) जिल्हाधिकारी कार्यालयासमोर धरणे आणि सत्याग्रह आंदोलन करण्यात आले.

रिझर्व्‍ह बॅंकेच्या परिपत्रकातील तरतुदीनुसार शेतकऱ्यांना प्रचलित बॅंकेतून (दत्तक असो अथवा नसो) स्केल आॅफ फायनान्सप्रमाणे पीक कर्जवाटप करण्यात यावे. बॅंक बदलण्याची सक्ती करण्याचा आदेश रद्द करण्यात यावा. यंदाच्या खरीप हंगामात चुकीच्या आदेशामुळे जिल्ह्यातील ७० हजारांहून अधिक शेतकऱ्यांना पीककर्जापासून वंचित रहावे लागले आहे. नवीन खातेदारांना कर्जाचे वाटप नगण्य आहे. जिल्हा मध्यवर्ती सहकारी बॅंकेच्या अनागोंदी कारभारामुळे पीक कर्जाचे वाटप अत्यंत कमी आहे. जिल्हा मध्यवर्ती सहकारी बॅंकेने कर्जमाफीची रक्कम पीक कर्जवाटपासाठी उपलब्ध करून द्यावी. थकबाकीदार शेतकऱ्यांना पीक कर्जवाटप करावे.

जिल्ह्यातील गोदावरी, दुधना, पूर्णा नद्यावरील बंधारे, धरणे, तलाव यांच्या लाभक्षेत्रातील शेतकऱ्यांना पाइपलाइनसाठी कर्ज देण्यात यावे. नाबार्ड, राज्य सरकार यांच्याकडून पीक कर्जवाटपासाठी निधी उपलब्ध करून द्यावा. नवीन खातेदारांना कर्जवाटप करावे, आदी मागण्यांसाठी शेतकरी संघर्ष समितीतर्फे करण्यात आलेल्या धरणे आंदोलनामध्ये भारतीय कम्युनिस्ट पक्षाचे जिल्हा सरचिटणीस राजन क्षीरसगार, स्वाभिमानी शेतकरी संघटनचे मराठवाडा अध्यक्ष माणिक कदम, माधुरी क्षीरसागर, नवनाथ कोल्हे, शिवाजी कदम, अर्जुन समिंद्रे, ज्ञानेश्वर काळे आदीसह शेतकरी, कार्यकर्ते मोठ्या संख्येने सहभागी झाले होते.