मराठवाडा, विदर्भात कापूस खरेदी केंद्र सुरू करा : पाशा पटेल

लातूर : मराठवाडा व विदर्भात अद्यापही शेतकऱ्यांच्या घरात चाळीस टक्के कापूस आहे. भाव वाढेल या अपेक्षेने शेतकऱ्यांनी हा कापूस घरी ठेवलेला आहे. त्यात कोरोनाच्या पार्श्वभूमीवर देशभरात लॉकडाऊऩ झाले. याचा परिणाम कापूस खरेदीवरही झाला आहे. सोशल डिस्टन्सिंगचा वापर करीत मराठवाडा व विदर्भात शासनाने कापूस खरेदी केंद्र सुरू करावेत, अशी मागणी राज्य कृषी मूल्य आयोगाचे माजी अध्यक्ष पाशा पटेल यांनी कॉटन कार्पोरेशन ऑफ इंडियाच्या कार्यकारी संचालक अली इराणी यांच्याकडे केली आहे.

कोरोनामुळे सुरू असलेल्या लॉकडाऊनमुळे शेतकरी अडचणीत आला आहे. त्यात मराठवाडा व विदर्भात कापूस उत्पादक आर्थिक अडचणीत सापडले आहेत. या पार्श्वभूमीवर कापूस खरेदी केंद्र सुरू होणे गरजेचे आहे. याकरिता श्रीमती इराणी यांच्याशी चर्चा केली आहे. तामिळनाडू सरकारने ज्या प्रमाणे मार्केटिंगची व्यवस्था उभी केली आहे तशी व्यवस्था महाराष्ट्र सरकारने उभी केली तर शंभर टक्के कापूस खरेदी केला जाईल, अशी ग्वाही त्यांनी दिल्याचे श्री. पटेल यांनी सांगितले.

या संदर्भात राज्याच्या पणन सचिवांशी चर्चा केली आहे. यवतमाळ जिल्ह्यात खरेदीसाठी परवानगी दिली आहे. ती यशस्वी झाल्यानंतर इतर जिल्ह्यात खरेदी केंद्र सुरू करण्यात येतील असे सांगितले आहे. लवकर हे खरेदी केंद्र सुरू करावेत अशी मागणीही त्यांच्याकडे करण्यात आल्याचे ते म्हणाले. तूर, हरभरा खरेदीच्या संदर्भात नाफेडचे कार्यकारी संचालक संजय चड्डा यांच्याशी चर्चा करण्यात आली आहे. लॉकडाऊन उठल्यानंतर बाजारात तूर आणि हरभरा मोठ्या प्रमाणात येण्याची शक्यता आहे. असे झाले तर भाव पडणार आहेत. त्यात शेतकऱ्यांचेच नुकसान होणार आहे. हे लक्षात घेऊन राज्यात खरेदी केंद्राची संख्या वाढवावी व ती सुरू करावीत, अशी मागणी पणन सचिवांकडे करण्यात आली आहे. तसेच या संदर्भात कृषिमंत्री व कृषी सचिवांकडेही मागणी करण्यात आल्याचे श्री. पटेल यांनी सांगितले.

औरंगाबाद व जालना जिल्ह्यात मोसंबी मोठ्या प्रमाणात आली आहे. पैठण तसेच लातुरमध्ये असलेल्या कोल्ड स्टोअरेजमध्ये ती ठेवली गेली तर पुढे त्याचा फायदा शेतकऱ्यांना होणार आहे. पण या करिता कोल्ड स्टोअरेजचे भाडे केंद्र व राज्य सरकारने द्यावे अशी मागणीही करण्यात आल्याचे श्री. पटेल यांनी दिली.