लातूर : हमीभावापेक्षा कमी दराने शेतीमाल खरेदी केला तर व्यापाऱ्यांवर कारवाई होते, पण वायदे बाजारात याबाबत तर काहीच होत नाही, येथेही कारवाई व्हावी, अशी मागणी केंद्रीय अर्थमंत्री निर्मला सीतारमण यांच्याकडे केली असल्याची माहिती राज्य कृषिमूल्य आयोगाचे अध्यक्ष पाशा पटेल यांनी येथे दिली. आगामी अर्थसंकल्पाच्या संदर्भात नवीदिल्लीत आयोजित बैठकीतील माहिती देण्यासाठी मंगळवारी आयोजित बैठकीत श्री. पटेल बोलत होते. ते म्हणाले, ‘‘आगामी अर्थसंकल्पासंदर्भात चर्चा करण्यासाठी केंद्रीय अर्थमंत्री सीतारमण यांनी बैठक बोलावली होती. यात शेतकरी आणि पर्यावरणाच्या दृष्टीने काही सूचनाही केल्या आहेत. शेतकऱ्यांच्या हमी भावाचा मोठा प्रश्न आहे. || शेतकऱ्यांच्या शेतमालाला चांगला भाव मिळावा म्हणून केंद्र शासन चांगले पाऊल उचलत आहे. हमीभावातही वाढ केली जात आहे. हमीभाव दिला नाही तर व्यापाऱ्यांवर गुन्हे दाखल होतात, पण आजही वायदे बाजारात हमीभावापेक्षा कमी दराने शेतमालाची खरेदी केली जाते. पण येथे मात्र कारवाई होत नाही. येथेही अशी कारवाई झाली पाहिजे, अशी सूचना या वेळी करण्यात आली.’’ या वर्षी हरभऱ्याचा तिप्पट पेरा झाला आहे. गेल्या वर्षीचा १६ लाख टन हरभरा शिल्लक आहे. त्यामुळे देशातील हरभरा परदेशात पाठविण्यासाठी अर्थसंकल्पात योजना करावी, अशी मागणीही करण्यात आली आहे. मानव जातीच्या दृष्टीने पर्यावरणाचा धोका मोठा वाढत आहे. त्यामुळे यावर मात करण्यासाठी ‘कृषी’ तसेच ‘ॲग्रो फॉरेस्ट’साठी आकर्षक व प्रोत्साहन देणारी योजना जाहीर करावी अशी मागणी करण्यात आली आहे, असे श्री. पटेल यांनी सांगितले. देशात १५० लाख टन खाद्यतेल आयात केले जाते. येत्या काही दिवसांत तेलाच्या किमती वाढण्याची शक्यता आहे. त्यामुळे आयात शुल्क कमी करावे अशी मागणी होऊ शकते. पण गेल्या काही वर्षांत शेतकऱ्यांचा तेलबिया पेरण्याकडे कल वाढला आहे. त्यामुळे आयात शुल्क कमी करू नये, अशी मागणीही करण्यात आल्याचे श्री. पटेल यांनी सांगितले. लोदग्यात `पृथ्वी रक्षण` रेडिओ लोदग्यात लातूर जिल्ह्यातील पहिला रेडिओ सुरू करण्यात येत आहे. या रेडिओचे नाव `पृथ्वी रक्षण` असे आहे. या रेडिओची ९१.२ MHz अशी फ्रिक्वेन्सी आहे. हा कम्युनिटी रेडिओ असणार आहे. या रेडिओवर शेती व पर्यावरणाच्या संरक्षणाच्या संदर्भातच कार्यक्रम असणार आहेत. ता. २६ जानेवारी रोजी याची चाचणी घेतली जाणार आहे. सुरुवातीच्या काळात चार तास कार्यक्रम असणार आहेत. वेगवेगळ्या ॲपच्या माध्यमातून जगभरात हा रेडिओ ऐकला जाऊ शकतो. या रेडिओकरिता चारही कृषी विद्यापीठ, विविध शास्त्रज्ञ, वन विभाग, आयसीआरचे योगदान घेतले आहे, अशी माहितीही श्री. पटेल यांनी या वेळी दिली.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.