मोहोळ, जि. सोलापूर : कामगारांच्या खात्यावर ५ मार्चपर्यंत अडीच कोटी रुपये जमा करावयाचे व उर्वरित रक्कम १५ एप्रिलपर्यंत द्यावयाची, असे लेखी पत्र कारखाना प्रशासनाच्या वतीने तहसीलदार जीवन बनसोडे यांच्यामार्फत कामगार प्रतिनिधींना देण्यात आले. परिणामी, टाकळी सिकंदर (ता. मोहोळ) येथील भीमा सहकारी साखर कारखान्याच्या कामगारांचे विविध मागण्यांसाठी गेल्या १६ दिवसांपासून तहसील कार्यालयासमोर सुरू असलेले उपोषण मंगळवारी (ता.२५) मागे घेण्यात आले.
भीमा कारखाना गेल्या दोन वर्षांच्या दुष्काळामुळे आर्थिक अडचणीत आला आहे. त्यातच विस्तारीकरण व सहवीज निर्मिती प्रकल्प कार्यान्वित झाला आहे. दरम्यान, या सर्व घडामोडींत कामगारांचा पगार, निवृत्तिवेतन व शेतकऱ्यांच्या उसाची एफआरपीची रक्कम थकली. कामगारांनी १६ दिवसांपासून थकीत वेतनासह विविध मागण्यांसाठी उपोषण सुरू केले.
उपोषणकर्त्यांची कारखान्याचे माजी अध्यक्ष सुधाकर परिचारक, माजी आमदार राजन पाटील यांनी भेट घेतली. कामगारांना कारखान्याच्या अडचणीबाबत सांगितले. . प्रांताधिकारी सचिन ढोले यांनीही बैठक घेऊन मार्ग काढण्याचा प्रयत्न केला; मात्र कामगार आपल्या निर्णयावर ठाम राहिले.
बैठकीत निघाला तोडगा
दरम्यान, मंगळवारी जिल्हाधिकारी मिलिंद शंभरकर यांनी त्यांच्या दालनात कारखान्याचे उपाध्यक्ष सतीश जगताप, कार्यकारी संचालक सूर्यकांत शिंदे, तहसीलदार जीवन बनसोडे व कामगार प्रतिनिधींची बैठक आयोजित केली. या बैठकीत चर्चा होईल पैसे जमा करण्याचे ठरले. या वेळी भाजपचे तालुकाध्यक्ष सतीश काळे, शिवसेनेचे तालुकाप्रमुख अशोक भोसले, राष्ट्रवादीचे पक्षनेते ज्ञानेश्वर चव्हाण, दत्ता म्हस्के, दीपक भोसले व कामगार उपस्थित होते.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.