पल्स ऑक्सीमीटरद्वारे नागरिकांची तपासणी 

पुणे : जिल्ह्यात कोरोना रुग्णांच्या रुग्णांच्या संख्येत दिवसेंदिवस वाढ होत आहे. शरीरातील ऑक्सिजन कमी होणे या रोगाचे प्रारंभिक लक्षण आहे. या पार्श्वभूमीवर जिल्हा परिषदेत व पुणे प्लॅटफॉर्म फॉर कोव्हीड १९ रिसपॉन्स ग्रुपच्या मदतीने शरीरातील ऑक्सिजन तपासण्यासाठी पल्स ऑक्सीमिटर उपकरणाद्वारे तपासणी करण्यात येत आहे. वाघोली (ता. हवेली) येथे या उपक्रमाची सुरवात करण्यात आली असून, जिल्ह्यात मोहीम राबविणार असल्याची माहिती मुख्य कार्यकारी अधिकारी आयुष प्रसाद यांनी दिली.  पल्स ऑक्सिमीटर हे एक छोटे उपकरण बोटावर लाऊन आपल्या शरीरातील ऑक्सिजनची पातळी तपासली जाते. साधारणतः ९० युनिटपेक्षा जास्त ऑक्सिजनची पातळी ही योग्य समजली जाते. मात्र, त्या पेक्षा कमी पातळी असणे शरीरासाठी घातक असते. कोरोनाच्या रूग्णांत प्रारंभी काही लक्षणे आढळत नाही. मात्र, त्यांच्या शरीरातील ऑक्सिजनची पातळी ही कमी असते. ही पद्धत कोरोना तपासणीसाठी प्रमुख पद्धत नसली तरी याद्वारे काही प्रमाणात मदत होऊ शकते. या हेतूने तपासण्या सुरू करण्यात आल्या आहेत. ९० पेक्षा कमी ऑक्सिजनची पातळी असलेल्या नागरिकांची पुढील तपासणी करण्याच्या सूचना देण्यात येत आहेत.  पुणे प्लॅटफॉर्म फॉर कोव्हीड १९ रिसपॉन्स ग्रुपचे समन्वयक सुधीर मेहता म्हणाले, पल्स ऑक्सिमीटर द्वारे घरोघरी जाऊन तापसणी केली जाणार आहे. या माध्यमातून शासकीय आरोग्य यंत्रणेवर येणारा ताण काही प्रमाणात कमी करता येऊ शकेल. वाघोली ग्रामपंचायतीच्या दाट लोकवस्ती असलेल्या भागात पल्स ऑक्सिमीटरचे सर्वेक्षण सुरू करण्यात आले आहे.