मराठवाड्यातील मतदान टक्केवारीत किंचित घट

मराठवाड्यातील मतदान टक्केवारीत किंचित घट
मराठवाड्यातील मतदान टक्केवारीत किंचित घट

बीड, परभणी : मराठवाड्यातील बीड, उस्मानाबाद, लातूर, नांदेड, हिंगोली आणि परभणी मतदारसंघांसाठी गुरुवारी (ता. १८) मतदान झाले. किरकोळ अपवाद वगळता शांततेत झालेल्या या मतदानात बीड लोकसभा मतदारसंघात ६६.०६ टक्‍के, लातूर मतदारसंघात  ६२.१७ टक्‍के, उस्मानाबाद मतदारसंघात ६३.४२ टक्‍के मतदारांनी मतदान केले. याचबररोबर लोकसभेच्या नांदेड, परभणी, हिंगोली मतदारसंघांत एकूण ५४ लाख ३४ हजार २७३ मतदारांपैकी ३५ लाख २५ हजार २७६ (सरासरी ६४.८७ टक्के) मतदारांनी मतदानाचा हक्क बजावला. 

बीड लोकसभा मतदारसंघात एकूण २० लाख ४१ हजार १८१ मतदारांपैकी १३ लाख ४८ हजार ४७३ मतदारांनी आपल्या मतदानाचा हक्‍क बजावला. मतदानाची टक्‍केवारी ६६.०६ टक्‍के इतकी नोंदली गेली. लातूरमध्ये ६२.१७ टक्के मतदान झाले. १८ लाख ८३ हजार ५३५ मतदारांपैकी ११ लाख ७० हजार  ९४४ मतदारांनी मतदान केले. २०१४ च्या निवडणुकीत या मतदारसंघात ६२.७३ टक्के मतदान झाले होते. गतवेळीच्या तुलनेत या वेळी त्यात किंचित घट झाली. 

एकूण १८ लाख ७१ हजार ३८१ मतदार असलेल्या उस्मानाबाद मतदारसंघात ११ लाख ९६ हजार १६६ महिला व पुरुष मतदारांनी मतदान केले. गतवेळच्या लोकसभा निवडणुकीत ६३.६५ टक्‍के मतदान झालेल्या या मतदारसंघात या वेळी मतदानाचा टक्‍का किंचित कमी होऊन ६३.४२ टक्‍के इतका राहिला. 

नांदेड, हिंगोलीत मतदानाच्या टक्केवारीत वाढ, परभणीत घट

लोकसभेच्या नांदेड, परभणी, हिंगोली मतदारसंघांत एकूण ५४ लाख ३४ हजार २७३ मतदारांपैकी ३५ लाख २५ हजार २७६ (सरासरी ६४.८७ टक्के) मतदारांनी मतदानाचा हक्क बजावला. नांदेड, हिंगोलीत मतदानाच्या टक्केवारीत वाढ, तर परभणीत त्यात घट झाली.

नांदेड लोकसभा मतदारसंघात २०१४ च्या निवडणुकीत ६०.११ टक्के मतदान झाले होते. यंदा प्रशासनाने केलेल्‍या मतदान जनजागृतीमुळे ५ टक्‍क्‍यांनी मतदानाचा टक्‍का वाढला आहे. परभणीत १९ लाख ८३ हजार ९०३ मतदारांपैकी एकूण १२ लाख ५३ हजार ६१२ (६३.१९ टक्के) मतदारांनी मतदान केले. हिंगोली मतदारसंघात १७ लाख ३२ हजार ५४० मतदारांपैकी असे एकूण ११ लाख ५२ हजार ५४८ मतदारांनी (६६.५२ टक्के) मतदानाचा हक्क बजावला.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com