नगरमध्ये चार पिकांचे बियाणे बदलाचे प्रमाण १०० टक्के

नगर : पिकांची पेरणी, लागवड करताना आता नवीन वाणांचा वापर केला जात आहे. असे असले तरी अजूनही काही पिकांत दरवर्षी बियाणे बदलाचे प्रमाण अल्प आहे. खरिपात बाजरी, कापूस, सूर्यफूल आणि तीळ या चारच पिकांत दरवर्षी बियाणे बदलाचे प्रमाण १०० टक्के आहे. खरीप ज्वारीचे प्रमाण सर्वांत कमी म्हणजे दहा टक्के आहे. खरिपात साधारण भात, खरीप ज्वारी, बाजरी, मका, तूर, मूग, उडीद, भुईमूग, तीळ, सूर्यफूल, सोयाबीन, कापूस या पिकांची पेरणी, लागवड केली जाते. एकच बियाणे जास्त वर्षे वापरले तर उत्पादन क्षमता कमी होते. त्यामुळे दरवर्षी नवीन बियाणे वापरावे असा सल्ला कृषी विभागाकडून दिला जातो. ‘महाबीज’ व खासगी कंपन्याकडून बियाणे उपलब्ध करून दिले जाते. मात्र तरीही बियाणे बदलाचे प्रमाण अजूनही अनेक पिकांबाबत बदलत नसल्याचे चित्र आहे.

या वर्षी खरिपासाठी ४ लाख २४ हजार ४९६ हेक्‍टर क्षेत्रावर पेरणी व कापूस लागवड होण्याचा अंदाज धरून महाबीजसह खासगी कंपन्यांकडे ६२ हजार ५७६ क्विंटल बियाण्यांची मागणी करण्यात आली होती. त्यातील जवळपास चाळीस हजार क्विंटल बियाणे उपलब्धही झाले आहे. गेल्या तीन वर्षांतील मागणी आणि शेतकऱ्यांनी केलेला बियाणे बदल यानुसार विक्रीचा विचार करूनच मागणी केली जाते असे सांगण्यात आले.

कृषी विभागाने दिलेल्या माहितीनुसार चार पिकांत १०० टक्के, दोन पिकांत ५० टक्‍क्‍यांच्या पुढे तर बाकी सगळ्याच पिकांतील बियाणे बदलाचे प्रमाण ५० टक्‍क्‍यांच्या आत आहे. या वर्षी खरिपातील सगळ्याच पिकांत बियाणे बदलाचे प्रमाण किमान ५ ते १० टक्‍क्‍यांनी वाढावे यासाठी प्रयत्न केले जात असल्याचेही सांगण्यात आले.