सोलापूर जिल्ह्यात रास्त भाव दुकानांना ४९ गावांत परवानगी

सोलापूर : ‘‘जिल्ह्यात राष्ट्रीय अन्नसुरक्षा अधिनियमांतर्गत वाढीव लोकसंख्येमुळे आणखी ४९ गावांत रास्त भाव धान्य दुकानांना परवानगी देण्यात आली आहे. दुकानासाठी अर्ज करण्याची मुदत कार्यालयीन वेळेत २ नोव्हेंबर ते २ डिसेंबर आहे’’, अशी माहिती जिल्हा पुरवठा अधिकारी अनिल कारंडे यांनी दिली. 

सध्याची रास्त भाव दुकाने, किरकोळ केरोसीन परवाने तसेच ठेवून रद्द असलेली व यापुढे रद्द होणारी, राजीनामा दिलेली आणि लोकसंख्या वाढीमुळे द्यावयाची नवीन दुकाने व किरकोळ  केरोसीन परवाने शासनाने दिलेल्या प्राधान्य क्रमानुसार मंजूर करण्यात आली आहेत.

सर्वात जास्त बार्शी तालुक्‍यात १४ , माळशिरसमध्ये १२ दुकाने मंजूर झाली आहेत. नोंदणीकृत स्वयंसहायता बचत गट, नोंदणीकृत सहकारी संस्था, महाराष्ट्र सहकारी संस्था अधिनियम या कायद्यांतर्गत नोंदणी झालेल्या संस्था, महिला स्वयंसहायता बचत गट व महिलांच्या सहकारी संस्थांना अर्ज करता येईल. मंजूर दुकानांचे व्यवस्थापन महिला समुदायाद्वारे करणे आवश्‍यक आहे. 

     या गावात होणार रास्त धान्य दुकान  उत्तर सोलापूर : पाथरी, बीबी दारफळ  मोहोळ : बैरागवाडी, पासलेवाडी, शिंगोली, शिरापूर (मो),  अक्कलकोट : घोळसगाव, दुधनी, नन्हेगाव, कुरनूर माळशिरस : पानीव, घुलेनगर (पानीव), नातेपुते, फोंडशिरस, कुरबावी, कळबोळी, अकलूज दुकान नंबर ६४, श्रीपूर, गिरवी, भांबुर्डी, जाधववाडी, अकलूज दुकान नंबर ६९

सांगोला ः बंडगरवाडी (चिकमहूद) पंढरपूर ः सांगवी, पंढरपूर दुकान नंबर ५०/८४, चिंचुबे, नेपतगाव, तरटगाव, कासेगाव  बार्शी : आगळगाव, इर्ले, कोरगाव, चारे, चिंचोली, तावडी, भोईंजे, महागाव, नारी, बार्शी दुकान नंबर १६७, १७८, १८६, १९६, २००  माढा : आकुलगाव, बावी दुकान नंबर ३१६/०५, बावी दुकान नंबर ६२/८५  करमाळा : आळजापूर, नेरले, पोंधवडी, आवाटी.