पेट्रोल ४९, तर डिझेल ५९ पैशांनी महाग

नवी दिल्ली : आंतरराष्ट्रीय बाजारपेठेत सुरवातीला वधारलेल्या खनिज तेलाचा भाव आठवड्याच्या शेवटी स्थिरावला असला तरी, त्याचा इंधनदरावरील प्रभाव अद्याप कायम आहे. परिणामी तेल वितरक कंपन्यांनी रविवारी सलग चौथ्यांदा पेट्रोल दरात ४९ पैसे तर, डिझेल दरात ५९ पैशांची वाढ केली. नव्या दरवाढीनंतर राजधानी दिल्लीत पेट्रोल व डिझेलची अनुक्रमे ६९.७५ व ६३.६९ रुपये दराने विक्री सुरू आहे. मुंबईत पेट्रोल ४८ पैशांनी महागले असून, त्याचा दर ७५.३९ रुपयांवर गेला आहे. डिझेलदरात झालेल्या ६२ पैशांच्या वाढीमुळे एकलिटर डिझेलसाठी ग्राहकांना ६६.६६ रुपये मोजावे लागत आहेत. आठवडाभरात खनिज तेलदरात १२ टक्के वाढ नोंदविण्यात आली. याबरोबरच डॉलरच्या तुलनेत रुपयात झालेली घसरणही इंधनदरवाढीस कारणीभूत ठरत आहे. दरम्यान, गेल्या सात दिवसांत ८ व ९ जानेवारीचा अपवाद वगळता इंधनदरात पाचव्यांदा झालेल्या वाढीमुळे सर्वसामान्य नागरिक धास्तावले आहेत.