सोलापुरात पेट्रोल-डिझेल विक्रीवर ३१ मार्चपर्यंत बंदी

सोलापूर ः कोरोना विषाणूचा प्रादुर्भाव वेळीच रोखण्यासाठी जिल्हा प्रशासन सातत्याने विविध उपाय अंमलात आणत आहे. गर्दीचे प्रमाण अधिकाधिक टाळण्यासाठी सर्वाधिक प्रयत्न केले जात आहेत. या प्रयत्नांचा भाग म्हणून सोलापूर जिल्ह्यात अत्यावश्यक सेवेतील वाहने वगळता अन्य वाहनांना पेट्रोल-डिझेल विक्री बंद करण्याचा निर्णय घेतला आहे. येत्या ३१ मार्चपर्यंत हा निर्णय लागू असेल, असेही जिल्हा प्रशासनाने स्पष्ट केले. 

जिल्हाधिकारी मिलिंद शंभरकर यांनी वाढती गर्दी आणि सातत्याने सांगूनही लोकांची भूमिका बदलत नसल्याने विचार करुन हा निर्णय घेतल्याचे सांगितले. या आधी वेगवेगळ्या पातळ्यांवर सुरक्षेचे उपाय प्रशासन करत आहे. त्यात आता या नव्या निर्णयाची भर पडली आहे. 

जनता कर्फ्यूनंतर लॅाकडाऊन असूनही लोक रस्त्यावर फिरत आहेत. तसेच गटागटाने आणि गर्दीने जमा होत आहेत. त्याला पूर्णपणे आळा बसवण्यासाठी आता पेट्रोलपंपांवरही पेट्रोल-डिझेल याच्या विक्रीवर बंदी आणण्यात आली आहे. मात्र, अत्यावश्यक सेवेतील वाहनांना त्यासाठी सूट दिली आहे. तरीही पेट्रोल आणि डिझेल भरण्यासाठी पंपांवर लांबच्या लांब रांगा लावल्या जात आहेत. ही वाढती गर्दी लक्षात जिल्हाधिकारी शंभरकर यांनी हे आदेश काढले. 

अत्यावश्यक सेवेसाठी मिळणार पेट्रोल-डिझेल  या विक्रीमधून शेती, प्रक्रिया उद्योग, जीवनावश्यक वस्तू, दूध, अन्नधान्य पुरवणारे कर्मचारी यांना वगळण्यात आले आहे. ३१ मार्चपर्यंत त्याची अंमलबजावणी होणार आहे.