अमरावतीत पुन्हा गुलाबी बोंड अळीचा शिरकाव

अमरावती ः गेल्या दोन वर्षांपूर्वी जिल्ह्यात गुलाबी बोंड अळीचा कापसावर मोठ्या प्रमाणात प्रादुर्भाव झाला होता. त्यानंतर आता हंगामाच्या सुरवातीलाच पुन्हा अमरावती पाठोपाठ भातकुली व अचलपूर तालुक्‍यातही बोंड अळी दिसून आल्याने नियंत्रणात्मक उपाय योजनांचे आवाहन कृषी विभागाकडून करण्यात आले आहे.

विदर्भातील प्रमुख कापूस उत्पादक जिल्ह्यांसह अमरावती जिल्ह्यातही गेल्या दोन वर्षांपूर्वी बीटी कापसावर मोठ्या प्रमाणात गुलाबी बोंड अळीचा प्रादुर्भाव झाला होता. संपूर्ण पीक या किडीने गिळंकृत केल्याने कापूस उत्पादक हवालदील झाले होते. बोंड अळी नियंत्रणात येत नसल्याने अनेक भागांत कापूस काढून टाकावा लागला होता. याची दखल घेत शासनस्तरावरुन गुलाबी बोंड अळीच्या नियंत्रणासाठी व्यापक जनजागृती करण्यात आली. त्याचे परिणाम २०१८-१९ या वर्षाच्या हंगामात दिसून आले. 

गेल्यावर्षी काही जिल्ह्यांमध्येच किरकोळ प्रमाणात बोंड अळीचा प्रादुर्भाव होता. त्यावरून यावर्षी तो होणार नाही, अशी शक्‍यता वर्तविली जात होती. परंतु, हंगामाच्या सुरवातीलाच पूर्वहंगामी लागवड केलेल्या शेतकऱ्यांच्या शेतात गुलाबी बोंड अळीच्या डोमकळ्या आढळून आल्याने शेतकऱ्यांमध्ये भीतीचे वातावरण निर्माण झाले आहे. 

भातकुली तालुक्‍यातील कानफोडी, अमरावती तालुक्‍यांतील सुकळी येथे कृषी विभाग तसेच दुर्गापूर केव्हीकेच्या तज्ज्ञांकडून या संदर्भाने पाहणी करण्यात आली. उपविभागीय कृषी अधिकारी प्रिती रोडगे, दुर्गापूर केव्हीकेचे तज्ज्ञ डॉ. के. पी. सिंग, तालुका कृषी अधिकारी अशोक यांचा या पथकात समावेश होता. शेतकऱ्यांना या वेळी मार्गदर्शन करण्यात आले. निबोंळी अर्काचा उपयोग करण्याचे आवाहन या वेळी तज्ज्ञांनी केले.