वाशीममधील कृषी निविष्ठा केंद्रे सुरू ठेवण्याचे नियोजन करा ः जिल्हाधिकारी मोडक 

वाशीम : ‘कोरोना’ विषाणूच्या पार्श्वभूमीवर जिल्ह्यामध्ये २५ मार्चपासून संचारबंदी लागू करण्यात आली आहे. त्यानुसार सर्व खासगी व्यवसाय व आस्थापना बंद करण्याचे आदेश देण्यात आले आहेत. मात्र, बियाणे व खते या कृषी निविष्ठांचा जीवनावश्यक वस्तू १९५५ अंतर्गत समावेश होतो. स्थानिक पातळीवर शेतकऱ्यांकडून बियाणे, खते व औषधांची मागणी होण्याची शक्यता आहे. त्यामुळे संचारबंदी काळात आवश्यकतेनुसार बियाणे, खते व औषधे विक्री करणारी दुकाने सुरू ठेवण्याबाबत नियोजन करण्याचे आदेश जिल्हाधिकारी तथा जिल्हा दंडाधिकारी हृषीकेश मोडक यांनी सर्व तहसीलदारांना दिले आहेत. 

जिल्ह्यातील शेतकऱ्यांकडून बियाणे, खते व औषधांची मागणी होण्याची शक्यता असल्याने सर्व तहसिलदारांनी संबंधित तालुक्याचे तालुका कृषी अधिकारी व पंचायत समितीचे कृषी अधिकारी यांच्याशी चर्चा करून संभाव्य निविष्ठा मागणी लक्षात घेऊन बियाणे व खते दुकाने आवश्यकते नुसार सुरू ठेवण्याबाबत नियोजन करावे. 

या नियोजनाबाबत संबंधित निविष्ठा विक्री सेवा केंद्रास दुकाने चालू ठेवण्याबाबत कळवावे. आवश्यकतेनुसार चालू ठेवण्यात येणाऱ्या कृषी सेवा केंद्रांची नावे संबंधित कार्यक्षेत्राच्या पोलिस प्रशासनाला कळवावीत. जेणे करून शेतकऱ्यांना मागणीनुसार विहित वेळेत निविष्ठा उपलब्ध करून देणे सोयीचे होईल, असे जिल्हाधिकाऱ्यांनी दिलेल्या आदेशात म्हटले आहे.