कमी कालावधीतील कडधान्य पिके लावा : डॉ. एस. बी. पवार

जालना : ‘‘या विभागात अल्पभूधारक शेतकरी बांधवांची संख्या जास्त आहे. पावसाचा अनियमितपणा आणि बदलते हवामान यामुळे कमी कालावधीतील कडधान्य पिकांची सलग अथवा आंतरपीक म्हणून लागवड करावी,’’ असा सल्ला औरंगाबाद येथील राष्ट्रीय कृषी संशोधन प्रकल्पाचे प्रमुख डॉ. एस. बी पवार यांनी दिला.

मंठा तालुक्यातील मोसा येथे मूग शेती दिननिमित्त आयोजित प्रक्षेत्र भेटीप्रसंगी ते बोलत होते. कृषी विज्ञान केंद खरपुडी यांच्या माध्यमातून मोसा येथे वसंतराव नाईक मराठवाडा कृषी विद्यापीठनिर्मित मूग वाण बी.एम २००३-२  पिकाचे पीक प्रात्यक्षिक  शेतात घेण्यात आले होते. त्याची पाहणी या वेळी करण्यात आली.  

डॉ. पवार म्हणाले, ‘‘कृषी विद्यापीठाचे मूग, उडीद, सोयाबीन तूर आदी पिकांचे सुधारित वाण शेतकरी आवडीने लागवड करतात. कोरडवाहू शेतीत जमिनीची प्रत आणि त्यानुसार वाणाची निवड करणे यावर बरेच अवलंबून असते.’’ 

केंद्राचे वरिष्ठ शास्त्रज्ञ प्रा. श्रीकृष्ण सोनुने म्हणाले, ‘‘कृषी विद्यापीठ संशोधन करते. त्यामधून शिफारस झालेले तंत्रज्ञान शेतकऱ्यांपर्यंत घेऊन येतो. त्यामध्ये काही वेगळेपणा आढळल्यास तेदेखील विद्यापीठ शास्त्रज्ञांच्या नजरेत आणून देऊन परत योग्य ते तंत्रज्ञान देण्यासाठी केंद्र आणि कृषी विभाग या विस्तार यंत्रणेचा प्रयत्न असतो. या शेती दिनामुळे तंत्रज्ञान वरील शेतकऱ्यांचा विश्वास दृढ होतो.’’   कीटकशास्त्रज्ञ प्रा. अजय मिटकरी यांनी कापूस पिकावरील गुलाबी बोंड अळीच्या नियंत्रणाबाबतच्या एकात्मिक उपाययोजनांची तांत्रिक माहिती दिली.

‘‘आपल्याला जी योजना सोयीची आणि आवश्यक वाटते. त्यात सहभागी होऊन आपले शेतीपीक उत्पादन वाढवत राहा,’’ असा सल्ला तालुका कृषी अधिकारी व्ही. जे. राठोड यांनी दिला. विभागीय कृषी विस्तार शिक्षण केंद्राचे रामेश्वर ठोंबरे, शेतकरी उद्धव खेडेकर, प्रा. आगे उपस्थित होते.