काँग्रेस ना दिलवाली ना दलितवाली, केवळ 'डील'वाली : पंतप्रधान मोदी

चित्रदुर्ग, कर्नाटक : ‘काँग्रेस कधीच दिलवाली नव्हती, ती दलितवालीही नव्हती, ती केवळ ‘डील’वाली होती, जो पक्ष गरिबांचे भले करू शकत नाही त्या पक्षाला हद्दपार करण्याची वेळ आली आहे,’’ असा घणाघात पंतप्रधान नरेंद्र मोदी यांनी काँग्रेस पक्षावर येथे रविवारी (ता.६) केला आहे.  चित्रदुर्ग येथील प्रचारसभेदरम्यान ते बोलत होते. काँग्रेसने डॅा. बाबासाहेब आंबेडकरांचा देखील अपमान केला आहे. काँग्रेसच्या काळात भारतरत्न हा पुरस्कार केवळ एका घरासाठी राखीव होता, म्हणून त्यांनी बाबासाहेबांच्या महापरिनिर्वाणानंतर त्यांना पुरस्कार देण्यात आला नाही, ते काम आम्ही केले. तसेच, थोर वीरा मरकडी यांच्याकडून साहस आणि शौर्य शिकण्याची गरज आहे. त्याही दलित समाजातच जन्माला आल्या होत्या, असेही मोदी या वेळी म्हणाले. त्याचबरोबर, काँग्रेस वीरा मरकडी यांची जयंती साजरी करताना कधी दिसत नाही उलट ते मतांसाठी सुलतानाची जयंती साजरी करण्यासाठी पुढे येतात, अशी टीकाही त्यांनी या वेळी केली. कर्नाटक विधानसभा निवडणुकांचा प्रचार आता शिगेला पोचला आहे. भाजप आणि काँग्रेसदरम्यान एकमेकांवरती आरोपाच्या फैरी झडत आहेत. काल काँग्रेस अध्यक्ष राहुल गांधी यांनी एका व्हिडिओच्या माध्यमातून पंतप्रधान मोदी यांच्यावर टीका केली होती.