नगर जिल्हा परिषदेतही वाहताहेत सत्तांतराचे वारे

nagar zillha parishad
nagar zillha parishad

नगर ः राज्यात एकीकडे भाजपला सत्तेपासून दूर ठेवण्यासाठी काँग्रेस, राष्ट्रवादी, शिवसेना या तीन पक्षांनी एकत्र येण्याची तयारी सुरू केली असताना, दुसरीकडे जिल्हा परिषदेतही असाच प्रयोग करण्याची चाचपणी करण्यात येत आहे. जिल्हा परिषदेच्या अध्यक्षपदासाठी खुल्या प्रवर्गातील महिलेसाठी आरक्षण पडल्याने पुन्हा एकदा जिल्हा परिषदेच्या राजकारणात रंगत येणार आहे. 

सद्यःस्थितीत काँग्रेसच्या शालिनी विखे पाटील या जिल्हा परिषद अध्यक्ष आहेत. त्यांच्यानंतर अध्यक्ष कोण होणार याबाबत चर्चा रंगत आहेत. राज्यात शिवसेना, कॉंग्रेस, राष्ट्रवादीचा एकत्र येण्याचा प्रयोग यशस्वी होत असल्याचे दिसत असल्याने ‘मिनी मंत्रालयातील’ धुरीणांनी या प्रयोगाची जिल्ह्यात चाचपणी सुरु केली आहे. अध्यक्षा शालिनीताई विखे पाटील यांचे पती आमदार राधाकृष्ण विखे पाटील व पुत्र खासदार डॉ. सुजय विखे पाटील यांनी भाजपात प्रवेश केला असला, तरी शालिनीताईंनी मात्र आपण अजूनही काँग्रेसमध्येच असल्याचे सांगितले आहे.

जिल्हा परिषदेच्या राजकारणातून विखे पाटील यांना दूर सारण्यासाठी काँग्रेसचे प्रदेशाध्यक्ष बाळासाहेब थोरात व राष्ट्रवादीने स्थानिक पातळीवर खलबतं सुरू केली आहेत. शालिनीताई विखे जरी तांत्रिकदृष्ट्या काँग्रेसमध्ये असल्या तरी भाजपच्या कार्यक्रमांमधील त्यांची उपस्थिती लपून राहिलेली नाही. त्यामुळे जिल्ह्यातला थोरात गट व राष्ट्रवादी आधीच सावध झाले आहेत. आरक्षणाची पद्धत सुरू झाल्यापासून शालिनीताई विखे यांनी सर्वाधिक काळ अध्यक्षपद भूषविले आहे.

आता आरक्षण पुन्हा सर्वसाधारण महिलेसाठी पडले आहे. त्यामुळे  शालिनीताई विखे यांना पुन्हा संधी असल्याचे बोलले जात असून, त्यांना नव्याने अध्यक्ष होण्यासाठी पुन्हा शुभेच्छाही दिल्या जात आहेत. विधानसभेनंतर आमदार शंकरराव गडाख यांनी शिवसेनेला पाठिंबा दिला असल्याने त्यांच्याकडील मतं ही शिवसेना, कॉंग्रेस, राष्ट्रवादीच्या पारड्यात पडू शकतात, असा कयास बांधला जात आहे. त्यामुळे त्यांच्या एखाद्या सदस्याला समिती सभापतिपद मिळू शकते, तर शिवसेनेच्या तिकिटावर निवडून आलेले सदस्य ऐनवेळेस कुणासाठी धनुष्याला ताण देणार हे पाहणेही महत्त्वाचे आहे. अध्यक्षपदाच्या तयारीत असलेल्यांना अंदाजपंचे ठोकताळे बांधावे लागत असून, अध्यक्षपदाचे सूत जुळेना झाले आहे.

जिल्हा परिषदेतील सध्याचे संख्याबळ 
काँग्रेस   २३ 
राष्ट्रवादी १९
शिवसेना
भाजप  १४
क्रांतिकारी शेतकरी पक्ष
महाआघाडी
कम्युनिस्ट  
शेतकरी विकास मंडळ 
जनशक्ती 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com