शिरूर, मावळ मतदारसंघांत उद्या मतदान

पुणे : लोकसभा निवडणुकीच्या चौथ्या टप्प्यामध्ये जिल्ह्यातील शिरूर आणि मावळ लोकसभा मतदारसंघांसाठी सोमवारी (ता. २९) मतदान होणार आहे. शिरूरमध्ये २ हजार ५०४, तर मावळमध्ये २ हजार २९६ केंद्रांवर मतदान प्रक्रिया पार पडेल. प्रशासनाकडून सर्व तयारी पूर्ण झाली असल्याचे जिल्हाधिकारी नवलकिशोर राम यांनी सांगितले. 

शिरूरमधून शिवसेना-भाजप युतीचे उमेदवार विद्यमान खासदार शिवाजीराव आढळराव पाटील आणि काँग्रेस-राष्ट्रवादी आघाडीचे उमेदवार डॉ. अमोल कोल्हे यांच्यात, तर मावळमध्ये युतीचे विद्यमान खासदार श्रीरंग बारणे आणि आघाडीचे उमेदवार पार्थ पवार यांच्यात मुख्य लढत होत आहे. 

शिरूर मतदारसंघासाठी जिल्ह्यातील जुन्नर, आंबेगाव, खेड-आळंदी, भोसरी, हडपसर, शिरूर विधानसभा, तर मावळसाठी मावळ, चिंचवड, पिंपरी विधानसभा मतदारसंघांचा समावेश आहे. मावळमधील ४७, तर शिरूरमधील ३१ मतदान केंद्रे संवेदनशील अाहेत. अनुक्रमे १२४ आणि २३० केंद्रांवरून मतदान प्रक्रियेचे थेट प्रक्षेपण (वेब कास्टिंग) होणार आहे. 

मावळमध्ये २२ लाख ९७ हजार मतदार आहेत. १२ हजार ६५९ कर्मचारी नियुक्त आहेत. शिरूरमध्ये २१ लाख ७३  हजार मतदार आहेत. त्यासाठी १५ हजार ३३१ कर्मचाऱ्यांची नियुक्ती करण्यात आली आहे. मतदानाची टक्केवारी वाढवी, यासाठी प्रत्येक विधानसभा मतदारसंघातील एक केंद्र महिला कर्मचाऱ्यांमार्फत चालविले जाणार आहे, अशी माहिती जिल्हाधिकाऱ्यांनी दिली. 

महिलांमार्फत चालविण्यात येणारी मतदान केंद्रे

मावळ लोकसभा मतदारसंघ  

शिरूर लोकसभा मतदारसंघ