सोलापुरात डाळिंबाला उठाव; दरात सुधारणा

सोलापूर ः सोलापूर कृषी उत्पन्न बाजार समितीच्या आवारात गतसप्ताहात डाळिंबाची आवक तुलनेने कमीच राहिली. पण मागणी असल्याने दर चांगलेच वधारले. डाळिंबाला प्रतिक्विंटलला सर्वाधिक १७ हजार रुपये प्रतिक्विंटल इतका दर मिळाला, असे बाजार समितीच्या सूत्रांकडून सांगण्यात आले. 

गतसप्ताहात बाजार समितीच्या आवारात डाळिंबांची आवक रोज साधारण अर्धा ते एक टनापर्यंत राहिली. वास्तविक, मागणीच्या प्रमाणात ही आवक नसल्याने डाळिंबाला चांगला उठाव मिळतो आहे. त्यातच सध्या विविध रोगाच्या प्रादुर्भावाने डाळिंबात समस्या वाढली आहे. साहजिकच सरासरी उत्पादन कमी निघते आहे. तसेच गुणवत्ताही मिळत नाही. मागणी आणि आवक यात तीव्र तुटवडा जाणवत असल्याने त्याचा परिणाम दरावर झाला आहे. गेल्या काही दिवसांपासून दरातील तेजी वाढली आहे. या सप्ताहात पुन्हा आणखी तेजी राहिली. 

डाळिंबाची आवक सांगोला, मंगळवेढा, माढा, मोहोळ या स्थानिक भागातून झाली. डाळिंबाला प्रतिक्विंटलला किमान एक हजार रुपये, सरासरी साडेतीन हजार रुपये आणि सर्वाधिक १७ हजार रुपये असा दर मिळाला. संपूर्ण सप्ताहभर ४०० ते ५०० रुपयांच्या फरकाचा चढ-उतार वगळता दर तेजीत राहिले. त्याशिवाय कांद्याचे दरही काहीसे स्थिर राहिले. कांद्याची आवक मात्र रोज ४० ते ५० गाड्यांपर्यंत कायम राहिली. कांद्याला प्रतिक्विंटलला किमान २०० रुपये, सरासरी एक हजार रुपये आणि सर्वाधिक २२०० रुपये असा दर मिळाला. 

वांगी, गवार, भेंडीच्या दरात या सप्ताहात बऱ्यापैकी वाढ झाली. त्यांची आवकही प्रत्येकी ३० ते ५० क्विंटलपर्यंत राहिली. वांग्यांना प्रतिक्विंटलला किमान ७०० रुपये, सरासरी २५०० रुपये आणि सर्वाधिक चार हजार रुपये, गवारीला किमान दोन हजार रुपये, सरासरी तीन हजार रुपये आणि सर्वाधिक चार हजार रुपये, तर भेंडीला किमान ५०० रुपये, सरासरी दोन हजार रुपये आणि सर्वाधिक तीन हजार रुपये असा दर मिळाला.

कोथिंबीर, मेथीही तेजीत

भाजीपाल्यामध्ये कोथिंबीर, मेथीच्या दरातही वाढ झाली. गेल्या काही दिवसांपासून त्यांची आवक कमीच आहे. प्रतिदिन ८ ते १० हजार पेंढ्यांपर्यंतच आवक आहे. पण मागणी अधिक असल्यानं दर तेजीत राहिले. कोथिंबिरीला शंभर पेंढ्यांसाठी एक हजार ते १५०० रुपये, मेथीला ८०० ते १३०० रुपये, शेपूला ५०० ते ८०० रुपये आणि चुका, पालकाला प्रत्येकी ३०० ते ४०० रुपये असा दर मिळाल्याचे सांगण्यात आले.