सातपुड्यात मूगाच्या नुकसानीची शक्यता

जळगाव  ः खानदेशात सातपुडा पर्वत भागात पाऊस टिकून आहे. या भागात सततच्या पावसाने मूग पिकाचे नुकसान शक्य आहे. भिज पाऊस सुरूच राहिला, तर अतिवृष्टी होवू शकते. यामुळे काढणीवर आलेल्या मुगाच्या शेगांमधील दाण्यांना कोंब फुटू शकतात, अशी स्थिती आहे. 

मुगाचे पीक सातपुडा पर्वत भागात नंदुरबारमधील शहादा, तळोदा, धुळ्यातील शिरपूर, जळगावमधील चोपडा, रावेर, यावल आदी भागात जोमात होते. तर सातमाळा भागात पाचोरा, चाळीसगाव, जामनेरकडेही मूग पीक जोमात होते. शेंगा जोमात लगडल्या. वाढही व्यवस्थित झाली. यंदा एकरी किमान तीन क्विंटलपेक्षा अधिक उत्पादन येईल, अशी अपेक्षा होती. परंतु, काढणीच्या वेळेस पिकाची स्थिती नाजूक बनली आहे. 

गेले तीन दिवंस सर्वत्र पाऊस सुरू आहे. त्यात भिज पाऊस आहे. सूर्यदर्शन नाही. यामुळे मूग पिकाच्या शेगांचे नुकसान होवू शकते. दाणे काळे, पिवळे पडून त्यांचा दर्जा घसरू शकतो. या स्थितीत लहान शेतकरी किंवा कमी क्षेत्रात पेरणी केलेल्या शेतकऱ्यांनी शेंगांची काढणी सुरू केली असून, काढणी करून शेंगा घरात साठविल्या जात आहेत. त्या घरात किंवा गोठ्यात पंख्याच्या कृत्रीम हवेत वाळविण्याचा प्रयत्न सुरू आहे. वातावरण प्रतिकूल असल्याने शेंगा पक्व होण्याचे किंवा वाळण्याचे प्रमाण नगण्य झाले आहे. काढणी रखडत असल्याने त्यावरील पुढील पेरणीदेखील लांबणीवर पडण्याची शक्यता आहे. 

मुग काढणी कोलमडणार

अनेक शेतकऱ्यांनी मूग काढणी पोळा सणानंतर करण्याचे नियोजन केले होते. लागलीच त्यात मका, कांदेबाग केळी लागवडीची तयारी झाली होती. तर, काही शेतकरी कांदा लागवडीसाठीदेखील उत्सुक होते. परंतु, पावसामुळे हे नियोजन कोलमडणार असून, उत्पादन किमान २५ ते ३० टक्के कमी होवू शकते. तसेच पुढील पेरणीदेखील लांबणीवर पडेल. वाफसा वेळेत होणार नाही. यामुळे पेरणीपूर्व मशागतही करता येणार नाही, असे शेतकऱ्यांचे म्हणणे आहे.