मराठवाडा, विदर्भात तुरळक सरींची शक्यता 

पुणे : विदर्भ व मराठवाडा परिसरात काही प्रमाणात चक्रीय स्थिती आहे. ही स्थिती फारशी अधिक सक्रिय नसली तरी पुढील काही दिवस मराठवाडा व विदर्भात अंशतः ढगाळ वातावरण राहणार आहे. यामुळे उकाडा वाढणार आहे. आज (गुरुवार) संपूर्ण विदर्भात तर शनिवारपासून (ता. २४) मराठवाड्यातील नांदेड, लातूर, उस्मानाबाद जिल्ह्यांत पूर्वमोसमीच्या सरी पडतील. उद्यापासून (शुक्रवार) विदर्भात आकाश निरभ्र राहणार असल्याचा अंदाज हवामान विभागाच्या सूत्रांनी दिला. 

विदर्भातील होत असलेल्या बदलत्या वातावरणामुळे कमाल तापमानात सरासरीच्या तुलनेत दोन अंश सेल्सिअसपर्यंत वाढ झाली आहे. त्यामुळे कमाल तापमान वेगाने कमीअधिक होत आहे. बुलडाणा येथे सरासरीच्या तुलनेत दोन अंश सेल्सिअस, तर चंद्रपूर येथे सरासरीच्या तुलनेत एक अंश सेल्सिअसने वाढ झाली आहे. बुधवारी (ता. २१) सकाळी चोवीस तासांत विदर्भातील चंद्रपूर येथे सर्वाधिक ४२.८ अंश सेल्सिअस तापमानाची नोंदविले गेले. मागील तीन ते चार दिवसांपासून कमाल तापमानाबरोबर किमान तापमानातही सरासरीच्या तुलनेत दोन अंश सेल्सिअसपर्यंत वाढ झाली आहे. मध्य महाराष्ट्रातील महाबळेश्‍वर येथे सर्वांत कमी १८.१ अंश सेल्सिअस तापमान नोंदविले गेले. 

विदर्भ व परिसरात आणि मराठवाड्यात असलेल्या चक्रीय वाऱ्याच्या स्थितीचा प्रभाव अधिक नसला तरी ही स्थिती समुद्रसपाटीपासून १.५ आणि २.१ किलोमीटरच्या दरम्यान आहे. उत्तर कर्नाटकाच्या दक्षिण उत्तर भागादरम्यान असलेले कमी दाबाचे क्षेत्र कर्नाटकाच्या दिशेने सरकत असून, ते दक्षिण तमिळनाडू या परिसरात चक्रीय वाऱ्याच्या स्थिती रूपांतर होण्याची शक्यता आहे. तसेच तमिळनाडूच्या परिसरात समुद्रसपाटीपासून दीड किलोमीटर उंचीवर चक्रीय स्थिती सक्रिय होत आहे. त्याचा काहीसा परिणाम राज्यातील वातावरणावर होत असून, विदर्भात असलेले पूर्वमोसमी पावसाचे मळभ काहीसे दूर झाले आहे.