मान्सूनोत्तर पावसाचा पशुपालकांना फटका

नाशिक  : जिल्ह्यात होत असलेल्या सततच्या पावसामुळे जिल्ह्यातील शेळ्या व मेंढ्या दगावण्याचे प्रमाण वाढले आहे. या नुकसानीमुळे पशुपालक हतबल झाले आहेत. मान्सूनोत्तर पावसामुळे हवामानात होणारे बदल या मुळे अनेक संसर्गजन्य रोगांची साथ आली आहे. त्यात मेंढपाळांचे चराईसाठी होणारे स्थलांतर यामुळे शेळ्या व मेंढ्यांना प्रादुर्भाव वाढल्याने अशक्त होत आहेत. पावसामुळे शेळ्या मेंढ्यांना चरताना अडचणी येत आहेत. वातावरणात गारवा असल्याने गारठून मेंढ्या आजारी पडत आहेत. आजारी पडल्यानंतर कुठलाही इलाज करून मेंढ्यांना काहीही फरक पडत नसल्याचे लखमापूर येथील मेंढपाळ भागा कारभारी साळे यांनी सांगितले. सततचा पाऊस असल्याने मालेगाव तालुक्यातील रावळगाव, सातमाने, सवंदगाव परिसरासह तसेच बागलाण तालुक्यातील लखमापूर शिवारातील जनावरे मोठ्या प्रमाणावर दगावत आहेत. त्यामुळे या परिसरातील मेंढपाळांचे नुकसान झाले आहे. शुक्रवारी (ता. १) झालेल्या अवकाळी पावसामुळेदेखील ८५ गाय, म्हैस, बैल अशी जनावरे, तर ७०० हून अधिक शेळ्या मेंढ्या दगावल्या. तसेच येवला तालुक्यातील राजापूर, ममदापूर भागांतही मेंढ्या दगावण्याचे प्रमाण वाढले असून, आकडा १०० च्या जवळपास गेला आहे. उपजीविकेचे साधन मेंढी व शेळी पालन व्यवसाय असल्याने झालेल्या नुकसानीमुळे मोठे संकट मेंढपाळांवर ओढवले आहे. याबाबतचे निवेदन बबन मोगरे, तुळशीराम कोरडकर, जिभाऊ कोरडकर, राजू कोरडकर, विवेक गायकवाड, अशोक फटांगडे, ज्ञानेश्वर फटांगडे, हरी ढेपले, सचिन बिडगर, भाऊसाहेब वडक्ते व इतर मेंढी व शेळी व्यावसायिकांनी दिले. याबाबत ग्रामविकास राज्यमंत्री दादा भुसे यांनी नुकसानग्रस्त भागात संबंधित ग्रामसेवक, तलाठी, कृषी सहायक व पशुवैद्यकीय अधिकारी यांना त्वरित पंचनामे करण्याचे आदेश दिले. या संदर्भात ग्रामविकास राज्यमंत्री दादा भुसे यांनी तहसीलदार चंद्रजित राजपूत व संबंधित अधिकारी यांच्यासमवेत तातडीची बैठक घेऊन अवकाळी पावसामुळे दगावलेल्या मेंढ्यांचे त्वरित पंचनामे करण्याच्या सूचना केल्या.