आंबेगाव तालुक्यात बटाटा लागवड सुरू

ट्रॅक्टरव्दारे बटाटा लागवड करताना शेतकरी
ट्रॅक्टरव्दारे बटाटा लागवड करताना शेतकरी

महाळुंगे पडवळ, जि. पुणे  : आंबेगाव तालुक्‍यातील महाळुंगे पडवळ, कळंब, चास आदी गावांमध्ये रब्बी हंगामातील बटाटा लागवडीच्या कामांना शेतकऱ्यांनी सुरवात केली आहे. मजूरटंचाईवर मात करण्यासाठी ट्रॅक्‍टरच्या साह्याने आधुनिक तंत्रज्ञानाद्वारे बटाटा लागवड करण्याकडे शेतकऱ्यांचा कल आहे. गेल्या वर्षाच्या तुलनेत या वर्षी बटाटा बियाण्याचे बाजारभाव १५ ते २० टक्क्‍यांनी वाढले आहेत. 

या वर्षी पुरेसा पाऊस झाल्याने कळंब, चांडोली बुद्रुक, महाळुंगे पडवळ, नांदूर, टाकेवाडी, विठ्ठलवाडी, थोरांदळे, भराडी, नागापूर, जाधववाडी, रांजणी आदी ४० गावांत बटाटा लागवड केली जात आहे. नगदी पैसे मिळवून देणारे पीक म्हणून बटाटा पीक आहे. या वर्षी बटाटा बियाण्याचे दर दोन हजार रुपये ते २५०० रुपये क्विंटल आहेत. कीटकनाशके, खते, बियाणे, मजुरी असा एकरी ३५ ते ४० हजार रुपये खर्च बटाटा पिकासाठी येत आहे.

गेल्या वर्षाच्या तुलनेत या वर्षी जवळपास २५० एकर क्षेत्रात रब्बी हंगामात बटाटा पिकाची लागवड होईल, असा अंदाज कृषी विभागाने व्यक्त केला आहे. लागवडीसाठी मजूर उपलब्ध होत नसल्याने यांत्रिकीकरणाचा वापर बटाटा लागवडीसाठी करीत आहे. ८०० रुपये तास याप्रमाणे ट्रॅक्‍टरद्वारे लागवडीचा दर आहे. यंत्राद्वारे लागवड केल्यामुळे वेळ, खर्चात मोठ्या प्रमाणात बचत होते. कृषी विभागाने इतर अवजारांप्रमाणे बटाटा लागवड यंत्रही अनुदानावर उपलब्ध करून द्यावे, अशी मागणी शेतकरी प्रशांत सैद पाटील यांनी केली. 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com