खानदेशात पोल्ट्री व्यवसाय अडचणीत

धुळे : खानदेशात नंदुरबारमधील नवापूर, धुळ्यातील साक्री, शिंदखेडा परिसर पोल्ट्री उद्योगासाठी प्रसिद्ध आहे. परंतु, कोरोनामुळे हा उद्योग गेले पाच महिने अडचणीत आहे. बँकांकडून घेतलेले कर्ज, कोंबड्यांचे खाद्य, खरेदीदारांकडून मिळणारे कमी दर, यामुळे हा उद्योग अडचणीत सापडला आहे.

चांगल्या हंगामात नंदुरबार जिल्ह्यातून रोज तीन ते चार टन चिकनचा पुरवठा विविध भागात केला जातो. धुळ्यातही रोज एक दे दीड टन पुरवठा होत असतो. दाक्षिणात्य कंपन्या, मध्य प्रदेश भागातील खरेदीदार चिकन किंवा मांसल पक्षी खरेदीसाठी येतात. परंतु, हा उद्योग गेले सहा महिने अडचणीत आहे. चिकनची विक्री कमी झाली. नंतर मक्याचे दरही या उद्योगातील कमी मागणीमुळे कमी झाले. शेतकरीदेखील अडचणीत आले. हा उद्योग गतीने सुरू करायचा असेल, तर पूर्ण अर्थचक्र सुधारायला हवे. बँकांकडून जे कर्ज पोल्ट्रीधारकांनी घेतले, त्यावर सवलत हवी. 

पाच महिन्यांचे व्याज माफ करावे. कर्ज परतफेडीसाठी दोन वर्षे मुदत हवी आहे.  शासनाकडून सवलतही त्वरीत जाहीर व्हायला हवी.  या दरम्यान पोल्ट्रीधारकांना पक्ष्यांचे संगोपन, खाद्य, वैद्यकीय खर्च यासाठी निधी लागतो. हा खर्च पूर्वीएवढाच आहे. पण खरेदीदार दर कमी देतात. मजुरी महाग झाली आहे. फेब्रुवारी मध्ये कोंबड्यापासून कोरोना होतो, ही अफवा पसरली. यामुळे कोट्यवधी रुपयांचे नुकसान पोल्ट्रीधारकांना सहन करावे लागले. यात शेतकऱ्यांच्या मक्याचे दरही घसरले. 

तामिळनाडू, केरळ भागात पक्षांचे कुठल्या आपत्ती, रोगराईत नुकसान झाले, तर पोल्ट्रीधारकांना कंपन्यांकडून चार रुपये प्रतिकिलोचा दर मिळतो.  परंतु, आपल्या राज्यात नुकसान झाल्यावर कोणताही मोबदला दिला जात नाही. बँकांकडून कर्ज वसुली सुरूच आहे. शेडसाठी सवलती नाहीत. याबाबत साक्री तालुका पोल्ट्री फार्मर संघटनेच्या वतीने नायब तहसिलदार ए. बी.असटकर यांना नुकतेच निवेदन देण्यात आले.