प्रताप सरनाईकांचे ठाकरेंना पत्र;  मोदींशी जुळवून घेण्याची विनंती

मुंबई : शिवसेनेचे आमदार प्रताप सरनाईक यांनी मुख्यमंत्री, शिवसेनेचे पक्षप्रमुख उद्धव ठाकरे यांना पत्र पाठवून काँग्रेस-राष्ट्रवादीचे नेते शिवसेनेचे पदाधिकारी फोडण्याचा प्रयत्न करीत आहेत. सरकारमधील मंत्र्यांना आणि सनदी अधिकाऱ्यांना हाताशी धरून केंद्रीय तपास यंत्रणाचा ससेमिरा शिवसेनेच्या मागे लावत आहेत, असा आरोप करीत पंतप्रधान नरेंद्र मोदी यांच्यांशी जुळवून घेण्याची विनंती या पत्रात करण्यात आली आहे.  पत्रात म्हटले आहे, ‘‘सत्तेत एकत्र राहून काँग्रेस-राष्ट्रवादी काँग्रेस आपलेच कार्यकर्ते फोडत असतील, आपला पक्ष कमकुवत करीत असतील, तर पुन्हा एकदा आपण पंतप्रधान नरेंद्र मोदी यांच्याशी जुळवून घेतलेले बरे, असे माझे वैयक्तिक मत आहे. निदान यामुळे प्रताप सरनाईक, अनिल परब, रवींद्र वायकर या आपल्या सहकाऱ्यांना व त्यांच्या कुटुंबीयांना होणारा नाहक त्रास तरी थांबेल, अशी अनेक कार्यकर्त्यांची भावना आहे. कोणताही गुन्हा किंवा चूक नसताना केंद्रीय तपास यंत्रणांकडून आम्हाला नाहक त्रास सुरू आहे. एका केसमधून जामीन मिळाला, की तत्काळ जाणीवपूर्वक दुसऱ्या केसमध्ये गुंतवणे, त्यातून बाहेर आलो, की तिसऱ्या केसमध्ये गुंतवणे, अशा प्रकारचे जाणीवपूर्वक काम या तपास यंत्रणा करीत आहेत. मोदींसोबत जाण्याच्या एका निर्णयामुळे हे कुठेतरी थांबेल.’’ दरम्यान, भाजपचे प्रदेशाध्यक्ष चंद्रकांत पाटील यांनी म्हटले आहे, की सरनाईक यांच्या पत्राचा शिवसेना सकारात्मक विचार करणार असेल, तर आमचे पक्षश्रेष्ठीही योग्य विचार करतील.