नगर, नाशिक जिल्ह्यांत पूर्वमोसमीची हजेरी

पुणे : राज्यात पूर्वमोसमी पावसाला पोषक हवामान होत आहे. नाशिक अणि नगर जिल्ह्यासह राज्यात अनेक ठिकाणी पावसाने हजेरी लावली. राज्यातील कमाल तापमानातही वेगाने बदल होत असल्याचे दिसून आले आहे. रविवारी (ता.२) सकाळपर्यंतच्या २४ तासांमध्ये कमी झालेल्या तापमानात सोमवारी (ता.३) सकाळपर्यंत मोठी वाढ झाली होती.  विदर्भातील ब्रह्मपुरी व नागपूर येथे उच्चांकी ४७ अंश सेल्सिअस तापमानाची नोंद झाली. विदर्भासह मध्य महाराष्ट्र, मराठवाड्यात उष्ण लाट आली आहे. सोमवारी (ता. ३) सकाळपर्यंतच्या २४ तासांमध्ये विदर्भात जवळपास सर्वच ठिकाणी तापमान ४५ अंशांच्या पुढे गेले होते. उन्हाचा चटका अधिकच वाढल्याने मध्य महाराष्ट्रातील सातारा, सोलापूर, मराठवाड्यातील औरंगाबाद, बीड, परभणी, तर विदर्भातील सर्वच ठिकाणी उष्ण लाट आल्याचे दिसून आले. शुक्रवारपर्यंत (ता. ७) विदर्भात तीव्र लाटेचा, तर बुधवारपर्यंत (ता. ५) मध्य महाराष्ट्र मराठवाड्यात उष्ण लाटेचा इशारा देण्यात आला आहे. रविवारी दुपारनंतर नगर जिल्ह्यामधील राहुरी, पारनेर, कोपरगाव, नेवासा तालुक्यांत वादळी वाऱ्यासह पावसाने हजेरी लावली. पारनेर तालुक्यात सुपे, वाळवणे, हंगा, रांजणगाव मशिन परिसरात, राहुरी तालुक्यातील चिंचवडगाव, कोपरे वांजुळपोई, कोंढवड, सोनगाव, सात्रळ, पिंपरी अवघड, मांजरी भागात, नेवासा तालुक्यातील मांजरी, करजगाव परिसरात तर कोपरगाव तालुक्यातील काही गावांसह शहर परिसरात वादळी पाऊस झाला. नाशिक जिल्ह्यातही काही ठिकाणी पावसाच्या सरी बरसल्या. सोमवारी (ता. ३) सकाळी साडेआठ वाजेपर्यंतच्या २४ तासांत राज्यातील विविध ठिकाणचे कमाल तापमान, कंसात सरासरीच्या तुलनेत वाढ, घट (अंश सेल्सिअसमध्ये) : पुणे ३९.४ (४.१), जळगाव ४३.२ (१.६), कोल्हापूर ३६.० (२.५), महाबळेश्वर ३३.२ (६.०), मालेगाव ४२.६ (३.८), नाशिक ३८.२ (१.७), सांगली ३८.६ (४.१), सातारा ३९.९ (५.८), सोलापूर ४३.३ (४.७), अलिबाग ३६.२ (३.४), डहाणू ३५.१ (१.१), सांताक्रूझ ३४.५ (१.१), रत्नागिरी ३३.७ (१.३), औरंगाबाद ४३.० (४.९), बीड ४४.४ (५.६), परभणी ४५.६ (५.१), अकोला ४५.९ (४.८), अमरावती ४५.४ (४.५), बुलडाणा ४२.३ (४.९), बह्मपुरी ४७.० (५.२), चंद्रपूर ४५.८ (३.३), गोंदिया ४३.० (०.८), नागपूर ४७.० (५.०), वाशीम ४३.०, वर्धा ४६.८ (५.२), यवतमाळ ४५.० (४.२). राज्यात वादळी पावसाचा अंदाज राज्यात गेल्या काही दिवसांपासून पूर्वमोसमीच्या सरी बरसण्यास सुरवात झाली आहे. शनिवारी विदर्भात हजेरी लावल्यानंतर रविवारी मध्य महाराष्ट्रात काही ठिकाणी वादळी वाऱ्यासह पाऊस पडला. आज. (ता. ४) विदर्भातील भंडारा, चंद्रपूर, गोंदिया, नागपूर, यवतमाळ, मध्य महाराष्ट्रातील कोल्हापूर, सांगली, सोलापूर, आणि मराठवाड्यातील, नांदेड, लातूर, उस्मानाबाद जिल्हा आणि परिसरात वादळी पावसाची शक्यता वर्तविण्यात आली आहे.