मराठवाड्यातील ३६६ मंडळांत पूर्व मोसमी पाऊस

औरंगाबाद  : मराठवाड्यातील आठही जिल्ह्यातील ४२१ मंडळापैकी तब्बल ३६६ मंडळात सोमवारी (ता. १) सकाळपर्यंतच्या चोवीस तासात पूर्व मोसमी पावसाने हजेरी लावली. 

उस्मानाबाद जिल्ह्यातील भूम तालुका अंतर्गत येत असलेल्या वालवड मंडळात सर्वाधिक ७० मिलिमीटर पाऊस झाला. त्यापाठोपाठ औरंगाबाद जिल्ह्यातील वैजापूर तालुक्यातील वैजापूर मंडळात ६७ मिलिमीटर पावसाची नोंद झाली. मराठवाड्यातील वैजापूर, पाथरी, भूम, माजलगाव तालुक्यात सरासरी ३० मिलिमीटरच्या पुढे पाऊस झाला. तर, वाशी, परळी, वडवणी, आष्टी अंबड, गंगापूर, पैठण तालुक्यात सरासरी २० ते ३० मिलिमीटर दरम्यान पाऊस झाला. परभणी जिल्ह्यातील पाथरी तालुक्यात सर्वाधिक सरासरी ४२.३३ मिलिमीटर पावसाची नोंद झाली. 

औरंगाबाद जिल्ह्यातील ६५ पैकी ५० मंडळांत पूर्व मोसमी पाऊस झाला. जिल्ह्यातील गंगापूर, वैजापूर तालुक्यात पावसाचा जोर अधिक होता. जिल्ह्यातील नागमठाण मंडळात ६४ मिलिमीटर, खंडाळा ४५, महालगाव ४२, गंगापूर ५१, भेंडाला ४६, लोहगाव ३६, पिंपळगाव पी. ४४ मिलिमीटर पावसाची नोंद झाली. जालना जिल्ह्यातील सर्व ४९ मंडळांत, परभणी जिल्ह्यातही सर्व ३९ मंडळांत पाऊस झाला. त्यांपैकी पाथरी मंडळात ४५ मिलिमीटर, बाभळगाव ४५, तर हादगाव मंडळात ४० मिलिमीटर पावसाची नोंद झाली. 

हिंगोली जिल्ह्यात ३० पैकी २४ मंडळांत १ ते २३ मिलिमीटर दरम्यान पाऊस झाला. नांदेड जिल्ह्यातील ८० मंडळांपैकी ५१ मंडळांत तुरळक ते हलका पाऊस झाला. बीड जिल्ह्यातील ६३ पैकी ६२ मंडळांत पावसाची हजेरी लागली. जिल्ह्यातील दिंद्रुड मंडळात सर्वाधिक ६० मिलिमीटर, त्यापाठोपाठ परळी मंडळात ४५, पिंपळगाव गाढे ३४, तालखेड ४१, गंगामसला ३५, धामणगाव ४०,आष्टी ३६, पाली मंडळात २९ मिलिमीटर पावसाची नोंद झाली.  भूम, वाशी मंडळांत अधिक जोर 

लातूर जिल्ह्यातील ५३ पैकी सर्व ५३ मंडळांत १ ते ३९ मिलिमीटर दरम्यान पाऊस झाला. हाडोळती मंडळात ३९ ,भादा ३४, औसा मंडळात ३० मिलिमीटर पावसाची नोंद झाली. उस्मानाबाद जिल्ह्यातील ४२ पैकी ३८ मंडळांत पाऊस झाला. जिल्ह्यातील पाऊस झालेल्या मंडळांपैकी वाशी मंडळात ३४ ,भूम ४१, तर नळदुर्ग मंडळांत ३० मिलिमीटर पावसाची नोंद झाली. जिल्ह्यातील भूम, वाशी तालुक्यातील सर्व मंडळांत पावसाचा जोर अधिक होता.