साताऱ्यात पूर्वमोसमी  पाऊस सुरूच 

सातारा : कऱ्हाड व सातारा तालुक्‍यांत अनेक गावांत विजांच्या कडकडाटासह पावसाने हजेरी लावली. वादळी वाऱ्याने वेगवेगळ्या ठिकाणी नुकसानही झाले. गारांमुळे फळपिकांचे मोठे नुकसान सुरू आहे. 

सातारा शहरासह काशीळ, नागठाणे परिसरात वादळी वाऱ्यासह मध्यम स्वरूपाचा पाऊस झाला आहे. कऱ्हाड शहर परिसरासह तालुक्‍यातील विविध भागात शनिवारी (ता.१)सायंकाळसह रविवारी (ता. २) दुपारीही वादळी वाऱ्यासह पावसामुळे मोठे नुकसान झाले. सायंकाळी वाऱ्यासह पाऊस झाला. ओंड, उंडाळे, रेठरे बुद्रुक येथे तीन दिवसांपूर्वी वादळी वाऱ्यासह झालेल्या पावसाच्या तडाख्याने नुकसान केले.

केसे, पाडळी व सुपने परिसराला मोठ्या प्रमाणावर वादळी वाऱ्याने झोडपले. काही वेळात वादळी वाऱ्यासह विजांचा कडकडाटातच पावसाला सुरुवात झाली. केसे येथील तांबी नावाच्या शिवारात गारांचा सडा पडला होता. गारांमुळे पिकांची दुरवस्था होऊन नुकसान झाले. सुपने, पाडळी परिसरात वादळी वाऱ्यामुळे नुकसान झाले आहे. 

वीज पडल्याने दोन शेतकऱ्यांचा मृत्यू 

शिरवळ, जि. सातारा : कवठे (ता. खंडाळा) येथे रविवारी दुपारी वेताळमाळ परिसरात वीज पडून दोन शेतकऱ्यांचा जागीच मृत्यू झाल्याची दुर्दैवी घटना घडली. शशिकांत दादासाहेब लिमण (वय ४२, रा. झगलवाडी) व खाशाबा भाऊसाहेब जाधव (वय ६०, रा. कवठे) अशी मृत झालेल्यांची नावे आहेत. 

या बाबत माहिती अशी, की झगलवाडी येथून शशिकांत लिमण पाच किलोमीटर अंतरावर असलेल्या वेताळमाळ शेतात खाशाबा जाधव यांच्या शेतात उन्हाळी भुईमूग भिजविण्यासाठी रविवारी कवठे येथे गेले होते. या वेळी खाशाबा जाधव हे ही शेतात काम करत होते. दुपारी विजेचा कडकडाट सुरू असताना शेतात काम संपल्यावर बांधावर झाडाखाली हे दोघेजण जेवण करीत असताना त्यांच्या अंगावर अचानक वीज पडून त्यांचा मृत्यू झाला.

लिमण हे मुंबई येथे काम करीत होते. मात्र, सध्या लॉकडाउन असल्याने ते गावी आले होते. खाशाबा जाधव कवठे येथे पिठाची गिरणी चालवत होते. दरम्यान, शिरवळ पोलिस ठाण्याचे सागर अरगडे, पांडुरंग हजारे व विनोद पवार यांनी घटनास्थळावर भेट देऊन पंचनामा केला.