खानदेशात पूर्वमोसमी पावसाचा तडाखा 

जळगाव ः खानदेशात बुधवारी (ता. २५) अनेक भागात पूर्वमोसमी पावसाने पिकांची मोठी हानी झाली. जामनेर तालुक्‍यात वादळात पत्र्याच्या छप्परावरील दगड पडल्याने महिलेचा मृत्यू झाला. धुळे, जळगाव जिल्ह्यात गहू, हरभरा, मका आदींची हानी झाली. 

धुळे जिल्ह्यातील शिरपूर, साक्रीसह धुळे तालुक्‍यात बुधवारी सायंकाळी अवकाळी पावसाने हजेरी लावली. शिरपूर शहरासह परिसरात  सायंकाळी तुरळक पाऊस झाला. गहू, मका काही भागात आडवा झाला. शॉर्टसर्किट झाल्याने काही ठिकाणी वीजपुरवठा खंडित झाला. यापूर्वी १७ मार्चला सायंकाळी शहरात गारपिटीसह वादळी पाऊस झाला होता. यात मोठ्या प्रमाणात नुकसान झाले. 

साक्री तालुक्‍यातही पिंपळनेर, देशशिरवाडे, पावडदेव, कड्याळे, पापडीपाडा, शेवगे, बल्हाणे, चिकसे, वंजारतांडा, उंभर्टी, शेलबारी, कातरवेल परिसरात गुरुवारी (ता. २६) दुपारी साडेचारला ढगांच्या गडगडाटासह पावसाने १५ मिनिटे हजेरी लावली. यामुळे कापणीसह काढणीवर आलेल्या गहू, हरभरा, मका, कांदा आदी पिकांचे मोठ्या प्रमाणात नुकसान झाले. शेतकऱ्यांची गव्हाचे पीक झाकण्यासाठी चांगलीच धांदल उडाली. धुळे तालुक्‍यातील लामकानीसह परिसरात काही वेळ तुरळक पाऊस झाला. शिंदखेडा शहरासह परिसरात ढगाळ वातावरण होते. 

जळगावात तुरळक पावसाच्या सरी  जळगाव शहरासह परिसरात बुधवारी सायंकाळी पाऊस झाला. दुपारी चारपासून ढगाळ वातावरण होते. सुमारे अर्धा तास वादळी वारा सुरू होता. वातावरणातही अचानक कमालीचा गारवा निर्माण झाला होता. सायंकाळी साडेपाचच्या सुमारास तुरळक पाऊस सुरू झाला. या वादळ व पावसामुळे गहू, हरभरा यासह फळबागांचे काही प्रमाणात नुकसान झाल्याची भीती व्यक्त होत आहे. कृषी उत्पन्न बाजार समितीत व्यापाऱ्यांनी खरेदी केलेले धान्य अचानक आलेल्या पावसामुळे ओले झाले.

जामनेर तालुक्‍यात महिला मृत्यूमुखी जामनेर तालुक्‍यात गोरनाळा (ता. जामनेर) येथे पत्र्यावरील दगड पडून बुधवारी दुपारी तीन-साडेतीनच्या सुमारास अचानक आलेल्या वादळी वाऱ्याने घरावरील पत्रे उडाली. त्यावर ठेवलेला मोठा दगड डोक्‍यावर पडल्याने सुभद्रा मनोहर शेळके (वय ६०) यांचा जागीच मृत्यू झाला.