परभणी जिल्ह्यात अवकाळीने हरभरा, ज्वारी, गहू पिकांचे नुकसान

परभणी ः जिल्ह्यात या महिन्यात झालेला अवकाळी पाऊस, वादळी वारे यामुळे हरभरा, ज्वारी, गहू, या रब्बी पिकांचे, उन्हाळी भुईमुगाचे मोठे नुकसान झाले. पंतप्रधान पीकविमा योजनेअंतर्गत सहभागी जिल्ह्यातील शेतकऱ्यांनी विमा दाव्यांसाठी ६ हजार ३५८ तक्रार अर्ज विमा कंपनीकडे सादर केले आहेत, अशी माहिती कृषी विभागाच्या सूत्रांनी दिली.

जिल्ह्यात गुरुवार (ता.१८) ते रविवार (ता.२१ ) या कालावधीत  झालेल्या अवकाळी पावसामुळे सुमारे ५ हजारहून अधिक हेक्टरवरील पिकांचे नुकसान झाल्याचा प्राथमिक अंदाज आहे. पंचनामे पूर्ण झाल्यानंतर अंतिम नुकसान क्षेत्र स्पष्ट होईल.

पंतप्रधान पीक विमा योजनेअंतर्गत सहभागी बाधित शेतकऱ्यांनी नुकसान भरपाई विमा दाव्यांसाठी तक्रारी विमा कंपनीकडे दाखल करा, असे आवाहन कृषी विभागातर्फे करण्यात आले. 

जिल्ह्यातील सर्वच तालुक्यातील एकूण ६ हजार ३५८ शेतकऱ्यांनी तक्रार अर्ज दाखल केले आहेत. पीकनिहाय तक्रार अर्जामध्ये हरभऱ्याचे ३ हजार ३१७ तक्रार अर्ज, ज्वारीचे २ हजार २०७, गव्हाचे ९९० तक्रार अर्ज, उन्हाळी भुईमूग पीक नुकसानीबद्दल २४ तक्रार अर्ज दाखल झाले आहेत.