पुणे जिल्ह्याच्या दुष्काळी भागात पावसाची हजेरी 

पुणे जिल्ह्याच्या दुष्काळी भागात पावसाची हजेरी 
पुणे जिल्ह्याच्या दुष्काळी भागात पावसाची हजेरी 

पुणे ः गणपतीच्या विसर्जनानंतर पुन्हा पावसाने जोर धरण्यास सुरवात केली आहे. पुणे जिल्ह्यातील दुष्काळी भागात तुरळक ठिकाणी बुधवारी (ता. १९) सायंकाळी आणि गुरुवारी सकाळीही हलका ते मध्यम स्वरूपाचा पाऊस पडला. जुन्नरमधील निमगाव येथे ८७ मिलिमीटर पाऊस पडल्याची नोंद झाली आहे. आत्तापर्यंत झालेल्या पावसामुळे धरणे तुडुंब भरली असून, अकरा धरणांतून पाण्याचा विसर्ग सुरू आहे. 

पुणे जिल्ह्याच्या पूर्व पट्ट्यात चांगलाच पाऊस पडत असला तरी, पश्चिम पट्ट्यात पावसाचा जोर कमी अधिक होता. काही ठिकाणी पावसाने उघडीप दिली आहे. जिल्ह्यात घोड धरणाच्या पाणलोट क्षेत्रात सर्वाधिक ७३ मिलिमीटर पावसाची नोंद झाली आहे. 

येडगाव धरणाच्या पाणलोट क्षेत्रातही ३५, पिंपळगाव जोगे १८, खडकवासला १३, भाटघर १० तर पूर्वेकडील उजनी धरणाच्या पाणलोट क्षेत्रात ३४ मिलिमीटर पाऊस पडला. तर माणिकडोह, वडज, डिंभे, विसापूर, कळमोडी, चासकमान, भामा आसखेड, वडीवळे, आंध्रा, कासारसाई, वरसगाव, पानशेत, गुंजवणी, नीरा देवघर, वीर या धरणांच्या पाणलोट क्षेत्रातही हलका पाऊस पडल्याने ओढे, नाले खळाळून वाहत आहे. त्यामुळे धरणेही तुडुंब भरली असून  वीर, भाटघर, उजनी, खडकवासला, घोड, भामा आसखेड या धरणांतून पाण्याचा विसर्ग सोडण्यात आला आहे. 

पूर्व पट्ट्यातील उजनी धरणाच्या पाणलोट क्षेत्रातील शिरूर, इंदापूर, दौंड, बारामती, पुरंदर या तालुक्यातही पावसाने चांगलीच हजेरी लावली आहे. अनेक ठिकाणी जोरदार पाऊस पडल्याने शेतकरी सुखावले आहेत. बारामतीतील माळेगाव ४३, पणदरे २४, लोणी भापकर, सुपा २२, इंदापुरातील भिगवण ३५, इंदापूर ५१, लोणी ३३, बावडा २८, काटी ३२, निमगाव केतकी २७, सणसर ३७, दौंडमधील रावणगाव ५३, पाटस ४४, देऊळगाव राजे ३८, केडगाव २२, पुरंदरमधील भिवंडी ५७, कुंभारवळण ३२, सासवड ३७, शिरूरमधील पाबळ ६१, कोरेगाव ४०, रांजणगाव, मलठण ३०, तळेगाव ३८, न्हावरा ३२, वडगाव रसोई २८, टाकळी २०, शिरूर ५५, खेडमधील शेळपिंपळगाव ६५, आळंदी ४३, राजगुरुनगर २४, कन्हेरसर २७ मिलिमीटर पाऊस पडला. जुन्नरमधील वडगाव आनंद ६६, बेल्हे ५२ मिलिमीटर पाऊस पडला. त्यामुळे काही प्रमाणात शेतकऱ्यांनी रब्बीची तयारी सुरू केली आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com