जळगावातील कोषागारमध्ये कोट्यवधींची बिले सादर

जळगाव : जिल्हाधिकारी कार्यालय, जिल्हा परिषदेतसह कोषागार विभागात ‘मार्चअखेर'मुळे रविवारीदेखील (ता.३१) रात्री उशिरापर्यंत कामकाज सुरू होते. ऑनलाईन कामे करण्यासाठी कर्मचाऱ्यांनी घरी जावून जेवण घेणेही टाळले. त्याची व्यवस्था कार्यालयातच करून घ्यावी लागली. कोषागार विभागात कोट्यवधी रुपयांची बिले मागील दोन दिवसात सादर झाल्याचे सूत्रांनी सांगितले.

जिल्हा परिषदेच्या अर्थ विभागात विविध विभागांतून कामांची बिले सादर करण्यात आली. यामुळे या विभागाकडून एकाच दिवसात कोषागाराकडे तब्बल ५५ कोटींची बिले सादर झाली. त्यात सर्वाधिक सिंचन व बांधकाम, समाजकल्याण विभागाची बिले होती. आर्थिक वर्षातील अंतिम दोन दिवसांत शासनाकडून विविध खात्यांवर कोट्यवधींचे अनुदान प्राप्त झाले आहे. मार्चअखेर निधी खर्च झाल्याचे दाखविण्यासाठी हा सर्व आटापिटा सुरू होता.

जिल्हा परिषदेत प्रत्येक विभागाकडून कामांची बिले, टेंडर बिले सादर करण्यात आली. शिक्षण, आरोग्य, सिंचन, बांधकाम, आमदार निधी, खासदार निधीच्या कामांची बिले सादर करण्यात आली. त्यातील काही बिले खात्यांवर वर्गही झाली.

जिल्हा परिषदेत दोन दिवसांपासून प्रत्येक विभागात बिले तयार करणे व पडताळणी करून मंजुरीचे काम उरकले जात होते. शासनाकडून शनिवारी (ता.३०) व रविवारी विविध खात्यांचे अनुदान प्राप्त झाल्यानंतर अर्थ विभागाकडून पडताळणी करण्यात आली. ती मुख्य कार्यकारी अधिकाऱ्यांची मान्यता घेऊन कोषागार विभागाकडे पाठविण्याची प्रक्रिया पार पाडण्यात आली.