धुळ्यात कांदा दरांवर दबाव, शेतकरी संकटात 

देऊर, जि. धुळे : लॉकडाऊन व इतर समस्यांमुळे कांद्याचे दर घसरले आहेत. त्याचा फटका कांदा उत्पादक शेतकऱ्यांना बसत असून, यासंदर्भात मार्ग निघून शेतकऱ्यांच्या कांद्याची रास्त दरात खरेदी व्हावी यासंबधी नेर (ता. धुळे) येथील शेतकरी सतिश बोढरे यांनी मुख्यमंत्री यांना इ-मेलद्वारे साकडे घातले आहे. 

धुळे, जळगाव जिल्हा कांदा उत्पादनासाठी प्रसिद्ध आहे. पण लॉकडाउनमुळे बाजारात मंदी आहे. उचल नाही. पणन व्यवस्थेला फटका बसला आहे. अशात केंद्रीय कृषी मंत्रालयाने राष्ट्रीय कृषी सहकारी विपणन महासंघाद्वारे (नाफेड) कांद्याची रास्त किंवा परवडणाऱ्या दरात खरेदी करावी व दिलासा द्यावा. यासाठी राज्याने पाठपुरावा करावा, अशी मागणी मुख्यमंत्री उद्धव ठाकरे यांच्याकडे त्यांनी केली आहे. 

शेतकरी बोढरे यांनी म्हटले आहे, की धुळे व जळगाव भागात कांदा पीक जोमात असते. यंदा लागवड अधिक झाली. परंतु दर पडले. लॉकडाऊनमुळे उचल कमी आहे. निर्यात, परराज्यातील पाठवणूक सुकर नाही. अडचणी वाढल्या आहेत. कांदा साठवणुकीची चांगली व्यवस्था खानदेशात नाही. उष्णता वाढत आहे. अशा स्थितीत कांदा टिकवून ठेवणे शेतकऱ्यांना शक्‍य नाही. बाजारात कांद्याची आवक मोठ्या प्रमाणात सुरू झाली आहे. कांदा दर किमान २० ते २५ रुपये प्रतिक्विंटल असायला हवा. परंतु दर पाच ते आठ रुपये प्रतिकिलो, असा आहे. शेतकऱ्यांना हा दर परवडणारा नाही. कोट्यवधींचा फटका शेतकऱ्यांना बसत असून, खर्चही निघणार नाही, अशी स्थिती आहे. सरकारने शेतकऱ्यांना मदतीचा हात द्यावा, अशी मागणी शेतकरी बोढरे यांनी केली आहे.