सोलापूर जिल्ह्यात ज्वारी, द्राक्षांसह डाळिंबांवर अवकाळी संकट

सोलापूर : जिल्ह्यात बुधवारी (ता. १८) सलग दुसऱ्या दिवशी रात्री अवकाळी पावसाने हजेरी लावली. रब्बी हंगामातील काढणीस आलेली ज्वारी, करडई या पिकांसह द्राक्ष आणि डाळिंब बागांनाही या पावसाचा फटका बसला. सांगोला, पंढरपूर, उत्तर सोलापूर, मंगळवेढा, बार्शी भागात प्रामुख्याने पावसामुळे पिकांवर संकट ओढवले. 

गेल्या आठवडाभरापासून जिल्ह्यातील वातावरण बदलले आहे. दिवसभर कडाक्‍याचे ऊन आणि रात्री प्रचंड गारवा, असे वातावरण आहे. बार्शी, पंढरपूर, उत्तर सोलापूर या भागातील द्राक्ष बागा सध्या काढणीच्या स्थितीमध्ये आहेत. त्यात आता पावसाने हजेरी लावल्याने पावसाचे पाणी द्राक्ष घडामध्ये साचून राहत असल्याने घड खराब होण्याचे प्रकार आहेत. त्यातच पुढील तीन-चार दिवस हीच स्थिती राहण्याची शक्‍यता हवामान खात्याने वर्तविली आहे. त्यामुळे बागायतदार चिंताग्रस्त झाले आहेत. 

उत्तर सोलापुरातील पडसाळी, वांगी, रानमसले भागात द्राक्षाशिवाय काढणीला आलेली ज्वारी, गहू, हरभरा, आंबा या पिकांनाही अवकाळी पावसाचा फटका बसत आहे. सांगोल्यात रात्री साडेसातच्या सुमारास वादळी वारे, विजेच्या कडकडाटासह तासभर अवकाळी पाऊस झाला. या पावसाने द्राक्ष, आंबा, डाळिंब, हरभरा, गहू या पिकांचे मोठ्या प्रमाणात नुकसान झाले. मंगळवेढ्यातही ज्वारी, करडई, द्राक्षे, डाळिंब, आंबा पिकाचे नुकसान झाले. ग्रामीण भागात विद्युतपुरवठा खंडित झाला. 

द्राक्ष बागायतदारांचा जीव कोंडीत

बार्शी तालुक्‍यातील चिंचोली, कुसळंब, पांगरी परिसरात रात्री पावणे आठ वाजेच्या सुमारास विजेच्या कडकडाटासह अवकाळी पाऊस झाला. सध्या द्राक्षे काढणीचा हंगाम चालू आहे. अधूनमधून वातावरणात होत असलेल्या बदलाबरोबर अवकाळी पावसाने द्राक्षे विक्रीस फटका बसत आहे. मागील दोन दिवसांपासून ऊन अन्‌ ढगाळ वातावरण निर्माण झाले आहे. बुधवारी दुपारी साडेचार वाजेच्या सुमारास रिमझिम पावसाने हजेरी लावली होती. रात्री पावणे आठ वाजेच्या सुमारास पुन्हा रिमझिम पावसाबरोबर सरी कोसळल्याने वातावरणात गारठा निर्माण झाला होता. 

ज्वारी भिजली, काळी पडणार

बार्शी तालुक्यात सध्या ज्वारी, हरभरा, गहू, कांदा आदी पिके काढून मळणीची घाई करत असताना अचानक आलेल्या अवकाळी पावसाने पिके भिजली आहेत. मंगळवेढा, उत्तर सोलापुरातही ज्वारी, करडई, द्राक्षे, डाळिंब, आंबा पिकाचे नुकसान झाले.