शेतीपंपासाठी पाच ते सहा टक्के वीज दरवाढ

नागपूर : गणेशोत्सवाच्या तोंडावर "महावितरण'ने वीजदरवाढीचे विघ्न लादले आहे. यात   शेतीपंपासाठी पाच ते सहा टक्के दरवाढ करण्यात आली आहे . वीजनियामक आयोगाने दिलेल्या आदेशाचा संदर्भ आणि कोळसा वाहतुकीवरील अधिक खर्चाचे कारण देत ऊर्जामंत्री चंद्रशेखर बावनकुळे यांनी वीजदरवाढीचे समर्थन केले आहे. बावनकुळे यांनी शुक्रवारी (ता.१४) पत्रकार परिषद घेत दरवाढीवर सविस्तर प्रकाश टाकला. "महावितरण'ने 34 हजार 646 कोटींची महसुली तूट भरून काढण्यासाठी दरवाढीचा प्रस्ताव दिला होता. मात्र, महाराष्ट्र वीज नियामक आयोगाने 20 हजार 651 कोटींची तूटच मान्य केली. त्यातील केवळ पाच टक्के सरासरी वीजदर वाढीच्या माध्यमातून आठ हजार 269 कोटींची वसुली करण्याची परवानगी दिली आहे. 2018-19 च्या अस्तित्वातील वीजदरात तीन ते पाच टक्के आणि 2019-20 वर्षासाठी चार ते सहा टक्के सरासरी दरवाढ करण्यात आली असून, एक सप्टेंबरपासून ती लागू झाली आहे. "महानिर्मिती'कडून वीजनिर्मितीचा खरेदी दर 4.19 रुपये होता. हा दर "एमईआरसी'ने 3.95 रुपये केल्याने साडेचार हजार कोटी वाचतील. शिवाय नव्या दरामुळेही "महापारेषण'ला देय दीड हजार कोटी वाचणार असल्याने वीजग्राहकांवर आलेला दरवाढीचा भार कमी असल्याचा आणि दरवाढीत सरकारचा हस्तक्षेप नसल्याचा दावा बावनकुळे यांनी केला. दरवाढीतील ठळक बाबी

शंभर टक्के सौरऊर्जा निर्मितीची मुभा छतावर सौरऊर्जा प्रकल्प वीजवापरा एवढा साकारण्याची मुभा ग्राहकांना देण्यात आली आहे. प्रकल्पावर एकूण वीजवापराच्या 40 टक्के, अशी मर्यादा टाकण्याची मागणी करण्यात आली होती.