वऱ्हाडात महाबीज बियाणे मिळण्यापूर्वी परमीटसाठीच शेतकऱ्यांच्या रांगा

अकोला ः राष्ट्रीय अन्न सुरक्षा मोहीम व ग्राम बीजोत्पादन योजना यामधून शेतकऱ्यांना चालू हंगामात महाबीजचे बियाणे अनुदानावर वितरित केले जात आहे. मात्र, हे बियाणे मिळविण्यासाठी लागणारे परमीट घेण्यासाठी शेतकऱ्यांना तासनतास रांगेत उभे राहावे लागत आहे. ग्रामीण भागातून येणाऱ्यांचा संपूर्ण दिवसच यासाठी खर्ची होत असल्याने नाराजी व्यक्त होत आहे. त्यामुळे प्रशासनाने परमीटवाटपासाठी आणखी कर्मचाऱ्यांची व्यवस्था करण्याची मागणी शेतकरी करीत आहेत. महाबीजचे अनुदानित बियाणे वाटपासाठी जिल्ह्यात मागील काही हंगामापासून परमीट लागू करण्यात आले आहे. दोन वर्षांपूर्वी बियाणेवाटपात झालेल्या घोळानंतर या जिल्ह्यात बियाण्यासाठी परमीट बंधनकारक करण्यात आलेले आहे. त्यामुळे आताच्या हंगामासाठी उपरोक्त योजनांचे अनुदानित बियाणे वितरण करण्यासाठी परमीट आवश्यक आहे. मात्र कृषी सहायकांनी हे परमीट वाटपास नकार दिला होता. कृषिकेंद्र चालकांनीही परमीटशिवाय बियाणे देण्यास नकार दिला. यामुळे हे प्रकरण चर्चेत आले होते. तोंडावर आलेला हंगाम लक्षात घेता तालुका कृषी कार्यालयात परमीटवाटप केले जात आहे. हे परमीट मिळविण्यासाठी गेल्या दोन दिवसांपासून तालुक्यातील शेतकऱ्यांच्या रांगा लागत आहेत. परमीटवाटपासाठी एकच काउंटर असून तासनतास उभे राहावे लागत आहे. खेड्यातून आलेल्या शेतकऱ्यांचा यामध्ये संपर्ण दिवस खर्ची होत आहे. शेतकऱ्यांचा कल प्रामुख्याने सोयाबीन बियाणे मिळविण्यासाठी आहे. योजनेनुसार या शेतकऱ्यांना जेएस ३३५ हे बियाणे अवघे एक बॅग मिळत आहे. सोयाबीनच्या या बियाण्याची प्रामुख्याने मोठी मागणी आहे. असे असताना ना वेळेवर परमीट दिले जात आहे ना हवे तितके बियाणे मिळत आहे, यामुळे अनेक शेतकऱ्यांचा अपेक्षाभंग होत आहे.

कर्मचारी वाढविण्याची गरज आहे. महाबीज बियाणे मिळण्यासाठी हवे असलेले परमीट तासन्‌तास उभे राहूनही भेटत नाही. अनेकजण सकाळपासून रांगेत असतात. त्यांना दुपारी परमीट मिळते. वाटपाची गतीसुद्धा संथ आहे. शेतकऱ्यांना पाहिजे असलेले बियाणे पुरेसे नाही. प्रशासनाने या ठिकाणी असलेल्या गैरसोयी तातडीने दूर कराव्यात.   - मनोहर ठोकळ, शेतकरी, दहिगाव गावंडे, ता. अकोला