शेतीप्रश्‍नावर ‘प्रहार’चे जेल भरो आंदोलन

अमरावती ः शेतकऱ्यांना संपूर्ण कर्जमाफी, पीकविम्याची रक्‍कम तातडीने द्यावी, यांसह शेतकऱ्यांच्या विविध मागण्यांसाठी आमदार बच्च कडू प्रणीत प्रहार संघटनेच्या वतीने बुधवारी (ता. ३१) राज्यभरात जेल भरो आंदोलन करण्यात आले.  प्रहारच्या वतीने विदर्भासह राज्यात ठिकठिकाणी जेल भरो आंदोलन करून शेतकऱ्यांच्या प्रश्‍नांकडे लक्ष्य वेधण्यात आले. या वेळी शेतकऱ्यांची संपूर्ण कर्जमाफी, पीकविम्याची रक्‍कम तातडीने देणे, शेतीच्या पेरणी ते कापणीपर्यंत कामांचा समावेश मनरेगात करावा, घोषित झालेल्या दुष्काळग्रस्त भागातील शेतकऱ्यांना दुष्काळी अनुदान द्यावे, दुष्काळी भागातील विद्यार्थ्यांना शैक्षणिक शुल्क माफ करावे, ओबीसी विद्यार्थ्यांसाठी स्वतंत्र वसतिगृह निर्माण करावे, आदिवासींचे प्रलंबित वनहक्‍क जमीनपट्टे त्वरित वितरित करावे, (कै.) गोपीनाथ मुंडे शेतकरी अपघात विमा योजनेत शेतमजूर व कामगांराचा समावेश करावा, कांदा, तूर, ऊस उत्पादकांना जाहीर केलेले अनुदान तातडीने देण्यात यावे, वाळलेल्या फळबागांना नुकसानभरपाई देण्यात यावी, दुबार पेरणीच्या संकटात असलेल्या शेतकऱ्यांना तातडीने बियाणे, खते व आर्थिक मदत द्यावी, प्रकल्पग्रस्तांचे पुनर्वसन, मोबदला व नोकरी द्यावी, निराधार, विधवांना वार्षिक दहा हजार रुपयांची भाऊबीज भेट मिळावी, अशा मागण्यांकडे लक्ष्य वेधण्यात आले. जिल्हा मुख्यालयात आंदोलन करून नंतर जिल्हाधिकाऱ्यांना निवेदन देण्यात आले.