तुरुंगात गेलेल्यांनी विचारू नये, की पवारांनी काय केले ः शरद पवार

सोलापूर ः ‘‘मी घरच्यांना सांगून आलो आहे, आता तुमचे तुम्ही बघा. मी घरी येणार नाही. आता मला काही लोकांकडे बघायचे आहे आणि पवारांनी काय केले, हे तुरुंगात गेलेल्यांनी तर अजिबात विचारू नये, मी आजवर अनेक बरी-वाईट कामं केली, पण कधी तुरुंगात गेलो नाही,’’ अशा शब्दांत राष्ट्रवादी काँग्रेसचे अध्यक्ष शरद पवार यांनी केंद्रीय गृहमंत्री अमित शहा यांच्यावर मंगळवारी (ता. १७) येथे निशाणा साधला.

मी वयाची ८० वर्षे पूर्ण केली, अशी सतत आठवण करून दिली जातेय, पण मी काय म्हातारा झालो नाही. मला अनेकांना घरी पाठवायचं आहे, ते या ठिकाणी उपस्थित तरुणाईच्या जोरावर, असे सांगत उपस्थित कार्यकर्त्यांमध्ये त्यांनी जोश आणताना पक्ष सोडून गेलेल्यांना फटकारेही मारले. 

आगामी विधानसभा निवडणुकीच्या पार्श्‍वभूमीवर पवार यांनी राज्यव्यापी दौऱ्याची सुरवात सोलापुरातून केली. यावेळी मुख्यमंत्री प्रचारात मश्‍गुल असल्याची टीका त्यांनी केली. किल्लारी भूकंपावेळी सकाळी सात वाजता मी किल्लारीला होतो, अशी आठवणही त्यांनी सांगितली. 

यावेळी महिला प्रदेशाध्यक्ष रुपाली चाकणकर, राष्ट्रवादी काँग्रेसचे कार्याध्यक्ष बळीराम साठे, राजूबापू पाटील, माजी आमदार राजन पाटील, भारत जाधव, संतोष पवार उपस्थित होते. 

कर्जमाफीवर पवारांचे बोट  शेतकऱ्यांची अवस्था वाईट झाली आहे. राज्यात १६ हजार शेतकऱ्यांनी आत्महत्या केल्या. त्यांच्या कुटुंबीयांची स्थिती काय झाली असेल याचा विचार कधी कुणी केला आहे का? आम्ही ७१ हजार कोटी रुपयांची कर्जमाफी केली. पण आजचे सरकार ऑनलाइन-ऑफलाइनच्या गप्पा मारत आहे, किती जणांचे कर्जमाफ झाले, हे अद्यापही सरकारला सांगता येत नाही, यावरही पवार यांनी बोट ठेवले.